பா.ஜ.க. எம்.பி.க்களுக்கு நரேந்திர மோடி எச்சரிக்கை: 'மாற்றிக் கொள்ளுங்கள், இல்லையேல் மாற்றத்துக்கு தயாராகுங்கள்'

பாராளுமன்றத்தில் பா.ஜ.க உறுப்பினர்களின் வருகைப்பதிவு குறைவாக இருக்கும் விவகாரம் குறித்து எச்சரித்திருக்கும் பிரதமர் நரேந்திர மோடி, உங்களை நீங்களே மாற்றிக் கொள்ளுங்கள், இல்லையேல் காலப்போக்கில் நடக்கும் மாற்றத்துக்குத் தயாராகுங்கள் என்று தெரிவித்துள்ளார்.

புது டெல்லியில் நேற்று அம்பேத்கர் சர்வதேச மையத்தில் நடைபெற்ற பா.ஜ.க பாராளுமன்ற குழுக் கூட்டத்தில் பிரதமர் மோடி இவ்வாறு கூறினார்.

இந்த கூட்டம் குறித்து தகவல்களை வெளியிட்ட பாராளுமன்ற விவகாரத் துறை அமைச்சர் பிரஹலாத் ஜோஷி, முதல் முறையாக, இந்தக் கூட்டம் பாராளுமன்ற வளாகத்துக்கு வெளியே நடைபெறுகிறது. கூட்டத்தில் பங்கேற்ற பாராளுமன்ற உறுப்பினர்களிடம், அவரவர் தொகுதிகளில் விளையாட்டு போட்டிகளை நடத்துமாறு மோடி வலியுறுத்தியதாகத் தெரிவித்தார்.

வருகைப் பதிவு குறித்த விவகாரம் பற்றி பேசிய பிரதமர் மோடி, பாராளுமன்ற விவகாரங்களில், அனைத்து பா.ஜ.க பாராளுமன்ற உறுப்பினர்களும் தவறாது பங்கேற்க வேண்டும். குழந்தைகளிடம் ஒரு செயலை செய்ய வேண்டாம் என்று மீண்டும் மீண்டும் சுட்டிக்காட்டினால், அவர்கள் கூட அந்தச் செயலை மீண்டும் செய்வதில்லை என்று குறிப்பிட்டார். மேலும், பாராளுமன்ற பா.ஜ.க உறுப்பினர்கள் தாங்களாகவே மாறுங்கள், இல்லையேல், காலப்போக்கில் நடக்கும் மாற்றத்துக்குத் தயாராகுங்கள் என்று மோடி தெரிவித்தார்.

பாராளுமன்ற பா.ஜ.க உறுப்பினர்களின் வருகைப் பதிவு மோசமாக இருப்பது குறித்து ஏற்கனவே பல முறை மோடி குறிப்பிட்டுப் பேசியுள்ளது குறிப்பிடத்தக்கது.