கடைசி காதல் கதை - விமர்சனம்

காதல் தோல்வி விரக்தியில் மன நலம் பாதிக்கப்பட்டு சிகிச்சை எடுத்துக் கொள்ளும் ஒரு இளைஞருக்கு அங்கே வித்யாசமான சிந்தனை பிறக்கிறது. அது என்ன சிந்தனை? அதைச் செயல்படுத்த நினைக்கும்போது என்னவெல்லாம் நடக்கிறது? என்பதைச் சிரிக்கச் சிரிக்கச் சொல்லியிருக்கும் படம் கடைசி காதல் கதை. அறிமுக நடிகர் ஆகாஷ் பிரேம்குமார், காதல் காட்சிகள் கோபக்காட்சிகள் ஆகியனவற்றில் பொருத்தமாக நடித்திருக்கிறார். காவல்துறை அதிகாரியாக வரும் மைம் கோபி, சாம்ஸ், அறிமுக நடிகை ஈனாக்‌ஷி கங்குலி, நண்பர்களாக வரும் ஆஷிக், நோபல் உள்ளிட்டோர் அவரவர் வேலையைச் அருமையாகச் செய்திருக்கிறார்கள். சேத்தன் கிருஷ்ணா இசையில் பாடல்களைக் காட்டிலும் பின்னணி இசை பொருத்தமாக அமைந்திருக்கிறது. சிவசுந்தர் ஒளிப்பதிவு அருமை. கதை, திரைக்கதை, வசனம் எழுதி ஆர்.கே. வித்யாதரன் இயக்கியுள்ளார். காதல் சிக்கலுக்குத் தீர்வு என்று முதலில் ஒன்றைச் சொல்லி சிரிக்க வைத்துவிட்டு கடைசியில் ஈகோதான் எல்லாச் சிக்கல்களுக்கும் காரணம் என்று சிந்திக்க வைத்திருப்பது பாராட்டுதலுக்குரியது.