மாஸ்கோ : தெற்கு சூடானின் உள்நாட்டு பாதுகாப்புக்கு ரஷ்யா உதவும் என்று அதிபர் புடின் உறுதிபட தெரிவித்துள்ளார். 

ஆப்பிரிக்க நாடான தெற்கு சூடான் கடந்த 2011-ம் ஆண்டு சூடானில் இருந்து சுதந்திரம் பெற்று தனிநாடாக பிரிந்தது. அது முதல் அங்கு அதிபர் சல்வா கீர் தலைமையிலான ஆட்சி நடந்து வருகிறது. அங்கு முதன்முறையாக அடுத்த ஆண்டு பொதுத்தேர்தல் நடைபெற உள்ளது.

இந்த நிலையில் அதிபர் சல்வா கீர் ரஷ்யா சுற்றுப்பயணம் மேற்கொண்டுள்ளார். அங்கு அதிபர் புடின் மற்றும் உயர் அதிகாரிகளை சந்தித்து பேச்சுவார்த்தை நடத்தினார்.  அப்போது தெற்கு சூடானின் உள்நாட்ட அரசியல் சூழ்நிலையை கையாளுதல் மற்றும் நாட்டின் பாதுகாப்பை உறுதி செய்ய ரஷ்யா உதவும் என புடின் கூறினார். 

மேலும் எரிசக்தி, வர்த்தகம் மற்றும் பிற துறைகளில் இருதரப்பு உறவுகளை விரிவுபடுத்துவது குறித்தும் அவர்கள் ஆலோசனை மேற்கொண்டதாக அதிகாரிகள் தெரிவித்தனர்.