இமாச்சலில் 1,200 அரசுப் பள்ளிகள் மூடல்

சிம்லா : கடந்த இரண்டரை ஆண்டுகளில் இமாச்சலப் பிரதேசத்தில் மொத்தம் 1,200 பள்ளிகள் மூடப்பட்டுள்ளதாக அம்மாநில கல்வி அமைச்சர் ரோஹித் தாக்கூர் தெரிவித்தார்.

இது குறித்து விளக்கம் அளித்துள்ள இமாச்சலப் பிரதேச கல்வி அமைச்சர் ரோஹித் தாக்கூர், “கடந்த இரண்டரை ஆண்டுகளில் மூடப்பட்ட 1,200 பள்ளிகளில் 450 பள்ளிகளில் மாணவர் சேர்க்கை பூஜ்ஜியமாக இருந்ததால் மூடப்பட்டன. மற்றவை குறைந்த மாணவர் சேர்க்கை காரணமாக இணைக்கப்பட்டன. 

6 முதல் 12-ஆம் வகுப்பு வரை 25-க்கும் குறைவான மாணவர் சேர்க்கை இருந்தால், அந்த பள்ளிகளை மற்றொரு பள்ளியுடன் இணைப்பதற்கான அளவுகோல் பராமரிக்கப்பட்டு வருகிறது. மாநில அரசு காலியாக உள்ள பணியிடங்களையும் நிரப்பி வருகிறது.  முந்தைய பா.ஜ.க. ஆட்சியின் போது கல்வித் துறையில் ஆட்சேர்ப்பு செயல்முறை நிறுத்தப்பட்டது, ஆனால், தற்போதைய அரசு காலியாக உள்ள பணியிடங்களை நிரப்புவதன் மூலம் கல்வித் துறையை வலுப்படுத்த தீவிரமாக செயல்பட்டு வருகிறது.

ஜனவரி 2025-இல் வெளியிடப்பட்ட 'ஆண்டு கல்வி நிலை அறிக்கை'யின்படி, இமாச்சலப் பிரதேசத்தில் உள்ள அரசுப் பள்ளி மாணவர்களின் வாசிப்புத் திறன் நாட்டிலேயே சிறந்ததாக இருந்தது. இந்த கணக்கெடுப்பின் பெரும்பாலான அளவுருக்களின்படி, இமாச்சலப் பிரதேசம் நாடு தழுவிய அளவில் பள்ளிக் கல்வியில் சிறந்து விளங்கும் மாநிலமாக மதிப்பிடப்பட்டுள்ளது” என்று அவர் தெரிவித்துள்ளார்.