ஆர்.சி.பி. அணிக்கு 7-வது இடம்

இந்திய  வீரர் அவினாஷ் தங்கம்

தென் கொரியாவில் 26வது ஆசிய தடகள சாம்பியன்ஷிப் நடக்கிறது.இந்தியா சார்பில் 58 பேர் உட்பட, 43 நாடுகளில் இருந்து 2000 வீரர், வீராங்கனைகள் பங்கேற்கின்றனர். நேற்று நடந்த ஸ்டிபிள் சேஸ் ஓட்ட இறுதிப் போட்டியில் இந்தியா சார்பில் தேசிய அளவில் சாதனை படைத்த அவினாஸ் பங்கேற்றார். 3, 000 மீ., பிரிவில் பந்தய தூரத்தை 8 நிமிடம் 20 வினாடிகளில் கடந்த அவினாஸ் முதலிடம் பிடித்து தங்கம் வென்று நாட்டிற்கு பெருமை சேர்த்தார். 

கடந்த 36 ஆண்டுகளில் இந்த பதக்கத்தை வெல்லும் முதல் இந்தியர் என்ற பெருமை இவருக்கு கிடைத்து உள்ளது. இந்த தொடரில் இந்தியா இதுவரை 3 தங்கம், 4 வெள்ளி, 2 வெண்கலம் என 9 பதக்கங்களை பெற்றுள்ளது.

ஆர்.சி.பி. அணிக்கு 7-வது இடம்

ஐ.பி.எல். போட்டிகள் 2008ஆம் ஆண்டு முதல் நடைபெற்று வருகின்றன. இதில் மும்பை, சிஎஸ்கே தலா 5 கோப்பைகளை வென்றுள்ளன.  18-ஆவது சீசன்களின் லீக் போட்டிகள் முடிவடைந்த நிலையில், இன்று குவாலிஃபயர் 1-க்கான போட்டியில் ஆர்.சி.பி., பஞ்சாப் அணிகள் முல்லான்பூரில் மோதுகின்றன. 

எலிமினேட்டர் போட்டியில் மும்பை இந்தியன்ஸ் அணியும் குஜராத் டைட்டன்ஸ் அணியும் மோதுகின்றன. 18 ஆண்டுகளாக கோப்பையே வெல்லாத ஆர்.சி.பி. அணி இந்தமுறை கோப்பையை வெல்லும் முனைப்பில் இருக்கிறது. லீக் போட்டிகளில் அசத்தும் ஆர்.சி.பி. அணிக்கு பிளே-ஆஃப்ஸ் போட்டிகளே எமனாக இருந்து வருகின்றன.

3-வது சுற்றில் சபலென்கா

கிராண்ட்சிலாம் போட்டிகளில் ஒன்றான பிரெஞ்சு ஓபன் டென்னிஸ் போட்டி பாரீஸ் நகரில் நடைபெற்று வருகிறது. உலகின் முதல் நிலை வீராங்கனையான சபலென்கா (பெலாரஸ்) 2-வது சுற்று ஆட்டத்தில் சுவிட்சர்லாந்தை சேர்ந்த ஜில் டீச்மேனை சந்தித்தார்.

இதில் சபலென்கா 6-3, 6-1 என்ற நேர் செட் கணக்கில் எளிதில் வென்று 3-வது சுற்றுக்கு தகுதி பெற்றார். இந்த வெற்றியை பெற அவருக்கு 1 மணி 19 நிமிட நேரம் தேவைப்பட்டது.

தோனி குறித்து ஜடேஜா உருக்கம்

 இந்திய அணியின் சிறந்த ஆல் ரவுண்டரான ரவீந்திர ஜடேஜா சக சி.எஸ்.கே. வீரர் அஷ்வினுக்கு பேட்டி அளித்தார். அந்த நேர்காணலில் பல சுவாரஷ்யமான தகவல்களை அவர் பகிர்ந்துள்ளார். அந்த நேர்காணலில் பேசிய ஜடேஜா, "எனது கிரிக்கெட் பயணத்தை செதுக்கியது 2 மகேந்திரன்கள் தான். ஒருவர் எனது சிறுவயது பயிற்சியாளர் மகேந்திரசிங் சவுகான். மற்றொருவர் மகேந்திர சிங் தோனி" என்று நெகிழ்ச்சியுடன் தெரிவித்தார்.

தோனியை பற்றி ஒரே வார்த்தையில் விவரிக்கச் சொன்னால் என்ன சொல்வீர்கள் என்று ஜடேஜாவிடம் அஷ்வின் கேள்வி எழுப்பினார். அதற்கு "அவரது மகத்துவத்தை விவரிக்க வார்த்தையே இல்லை. அவர் அனைவருக்கும் மேலாக நிற்கிறார்" என்று ஜடேஜா பதிலளித்தார்.

கைகலப்பில் ஈடுபட்ட வீரர்கள்

வங்காளதேசம் - தென் ஆப்பிரிக்கா வளர்ந்து வரும் வீரர்கள் (எமெர்ஜிங்) அணிகளுக்கு இடையே 4 நாள் கொண்ட டெஸ்ட் தொடர் நடைபெற்று வருகிறது. இதில் நடைபெற்ற முதல் போட்டி டிரா ஆனது. இதனையடுத்து இவ்விரு அணிகளுக்கு இடையிலான 2-வது மற்றும் கடைசி போட்டி கடந்த 27-ம் தேதி தொடங்கியது. இந்த போட்டியின் 2-வது நாளான நேற்று வங்காளதேச பேட்ஸ்மேன் ரிப்பன் மொண்டோல் மற்றும் தென் ஆப்பிரிக்க வீரர் ட்செபோ நடுலி களத்தில் மோதிக்கொண்டது இணையத்தில் வைரலாகி வருகிறது.

பேட்டிங் செய்து கொண்டிருந்த வங்காளதேச வீரர் ரிப்பன், நடுலி பந்துவீச்சில் சிக்சர் அடித்தார். அதன் பிறகு இருவரும் முறைத்துக் கொண்டே இருந்தனர். இதனால் கடுப்பான நடுலி, எதிர்முனையை நோக்கி சென்று கொண்டிருந்த ரிப்பன் உடன் வாக்குவாதத்தில் ஈடுபட்டார். வாக்குவாதம் முற்றவே இரண்டு வீரர்களும் ஒரு தள்ளுமுள்ளில் ஈடுபட்டனர், அதன் பிறகு அது ஒரு கை கலப்பாக மாறியது. நடுலி பலமுறை ரிப்பனின் ஹெல்மெட்டை இழுத்தார். நடுவர்கள் உள்ளே புகுந்து இருவரையும் சமாதானம் செய்து வைத்தனர். இந்த வீடியோ இணையத்தில் வைரலாகி வருகிறது.

இந்தியா வரும்  ஆஸி. அணி

ஆஸ்திரேலிய மகளிர் கிரிக்கெட் அணி இந்தியாவில் சுற்றுப்பயணம் மேற்கொண்டு 3 போட்டிகள் கொண்ட ஒருநாள் தொடரில் விளையாட உள்ளது. இந்த ஆண்டு இறுதியில் இந்தியாவில் நடைபெற உள்ள ஒருநாள் உலகக்கோப்பை தொடருக்கு தயாராகும் பொருட்டு நடைபெறும் இந்த தொடர் இரு அணிகளுக்கும் முக்கியத்துவம் வாய்ந்ததாக கருதப்படுகிறது.

அதன்படி இவ்விரு அணிகள் மோதும் முதல் ஒருநாள் போட்டி செப்டம்பர் 14-ம் தேதி நடைபெற உள்ளது. இந்த தொடரின் 3 போட்டிகளும் சென்னை சேப்பாக்கம் மைதானத்தில் நடைபெற உள்ளன. 2-வது ஒருநாள் போட்டி 17-ம் தேதியும், 3-வது ஒருநாள் போட்டி 20-ம் தேதி  நடைபெறுகிறது.