‘ஜின்’ திரை விமர்சனம்

மன்னர்கள் யுத்தத்தில் வெற்றி பெறுவதற்காக அவர்களுக்கு மந்திரவாதிகள் மூலம் கொடுக்கப்பட்ட சக்தி தான் ஜின். இதில், நல்ல ஜின்களும் உண்டு. கெட்டவைகளும் உண்டு. இப்படிப்பட்ட ஜின்கள் தற்போதைய காலக்கட்டத்தில் ஒருவரிடம் இருந்தால், என்னவெல்லாம் நடக்கும் என்பது தான் கதை. பல நூறு ஆண்டுகளுக்கு முன்பு மன்னர் ஒருவரிடம் இருந்த ஒரு நல்ல ஜின் நாயகன் முகேன் ராவ் வசம் வருகிறது. அது வந்த பிறகு, காதல், கல்யாணம், என வாழ்க்கை முன்னேற்றப் பாதையில் செல்லகிறது. அதே சமயம், அவரது மனைவி சில பிரச்சனைகள் காரணமாக உயிருக்கு ஆபத்தான நிலையில் மருத்துவமனையில் அனுமதிக்கப்படுகிறார். இந்நிலையில் ஜின் பற்றிய ரகசியம் ஒன்று முகேனுக்கு தெரிய வருகிறது. அது என்ன?, அதற்கும் தன் மனைவிக்கும் ம் என்ன சம்மந்தம்?, என்பதை சொல்வது தான் ‘ஜின்’. நாயகன் முகேன் ராவ் சிரித்து சிரித்து நடித்திருக்கிறார். நாயகி பவ்யா ட்ரிகா, சில காட்சிகளில் வந்துவிட்டு கோமாவில் படுத்து விடுகிறார். இசையமைப்பாளர்கள் விவேக் மெர்வின் இசையில் பாடல்களும், பின்னணி இசையும் சுமார் ரகம். எழுதி இயக்கியிருக்கும் டி.ஆர்.பாலா, ஜின் கிராபிக்ஸ் கதாபாத்திரத்தை மையமாக கொண்டு கதை நகர்த்தப்படுவது சிறுவர்களை கவரும் முயற்சியாக இருந்தாலும், தரமற்ற கிராபிக்ஸ் கதாபாத்திரம் மற்றும் அதன் செயல்பாடுகள் கதையோடு ஒட்டாமல் பயணிப்பது படத்திற்கு பலவீனமாக உள்ளது.