2 நாட்கள் முகாமிட்டு கோவையில் நலப்பணிகளை துவக்கி வைக்கிறார் முதல்வர் மு.க.ஸ்டாலின்

கோவை, முதல்வர் மு.க.ஸ்டாலின் தமிழகம் முழுவதும் மாவட்ட வாரியாக சென்று கள ஆய்வுப்பணி மேற்கொள்ள திட்டமிட்டுள்ளார். அதன்படி தனது முதல் கள ஆய்வுப்பணியை வருகிற 5-ந்தேதி கோவையில் தொடங்குகிறார். 5-ந்தேதி காலை சென்னையில் இருந்து விமானம் மூலம் கோவை புறப்பட்டு வரும் முதல்வர் மு.க.ஸ்டாலின் 2 நாட்கள் கோவையில் முகாமிட்டு பல்வேறு நலப்பணிகளை தொடங்கி வைக்கிறார். அத்துடன் அவர் கோவை மாவட்ட தி.மு.க. நிர்வாகிகளையும் சந்தித்து பேசுகிறார்.

முதல்வர் மு.க.ஸ்டாலின் பங்கேற்கும் நிகழ்ச்சிகள் விவரம் வருமாறு:- 5-ம் தேதி காலை 10 மணிக்கு சென்னையில் இருந்து புறப்பட்டு கோவை வரும் முதல்வர் மு.க.ஸ்டாலினுக்கு, விமான நிலையத்தில் அமைச்சர் செந்தில் பாலாஜி தலைமையில் உற்சாக வரவேற்பு அளிக்கப்படுகிறது. அங்கிருந்து கார் மூலம் மு.க.ஸ்டாலின் விளாங்குறிச்சி செல்கிறார். அங்கு புதிதாக ரூ.114.16 கோடி செலவில் கட்டப்பட்டுள்ள புதிய ஐ.டி. பார்க்கை திறந்து வைக்கிறார்.

பின்னர் ரேஸ்கோர்ஸ் அரசு விருந்தினர் மாளிகைக்கு செல்கிறார். அங்கு அரசு அதிகாரிகளுடன் ஆலோசனை நடத்துகிறார். மாலை 4 மணிக்கு கோவை மாவட்ட கலெக்டர் அலுவலகம் செல்கிறார். அங்கு தங்க நகை தயாரிப்பு தொழிலில் உள்ள சிக்கல்கள் குறித்தும், அதற்கு தீர்வு காணவும் சம்பந்தப்பட்ட பிரதிநிதிகள் மற்றும் அதிகாரிகளுடன் ஆலோசனை நடத்துகிறார்.

மாலை 5 மணிக்கு போத்தனூர் பிவிஜி திருமண மண்டபத்தில் கோவை ஒருங்கிணைந்த மாவட்ட தி.மு.க. நிர்வாகிகளுடன் ஆலோசனை நடத்துகிறார். பின்னர் ரேஸ்கோர்ஸ் அரசு விருந்தினர் மாளிகைக்கு சென்று இரவில் தங்குகிறார். மறுநாள் (6-ந்தேதி) காலை 10 மணிக்கு கோவை சிறை வளாகத்தில் 45 ஏக்கர் பரப்பளவில் ரூ.167 கோடி மதிப்பில் கட்டப்பட்டு வரும் செம்மொழி பூங்கா பணிகளை நேரில் பார்வையிட்டு ஆய்வு செய்கிறார்.

தொடர்ந்து காந்திபுரம் பஸ்நிலையம் பகுதிக்கு சென்று டவுன் பஸ் நிலையம் பின்புறம் 6.9 ஏக்கரில் கலைஞர் நூற்றாண்டு நூலகம் கட்டுவதற்கு அடிக்கல் நாட்டுகிறார். மதியம் விமானம் மூலம் மீண்டும் சென்னை திரும்புகிறார். கோவை வரும் முதல்வர் மு.க.ஸ்டாலின், அரசு விழாக்கள் மட்டுமின்றி தங்களையும் சந்தித்து பேசுவதால் தி.மு.க. நிர்வாகிகள் உற்சாகம் அடைந்துள்ளனர்.

மு.க.ஸ்டாலின் வந்து செல்லும் அனைத்து இடங்களிலும் அவருக்கு உற்சாக வரவேற்பு அளிக்க தி.மு.க.வினர் ஏற்பாடுகளை செய்து வருகிறார்கள். அமைச்சர் செந்தில் பாலாஜி கடந்த சில நாட்களாக கோவையில் முகாமிட்டு முதல்வர் மு.க.ஸ்டாலின் பங்கேற்கும் விழா ஏற்பாடுகளை நேரில் பார்வையிட்டு பணிகளை துரிதப்படுத்தி வருகிறார்கள். கோவை விளாங்குறிச்சியில் 8 தளங்களுடன் கட்டப்பட்டு உள்ள புதிய தொழில்நுட்ப பூங்காவை 5-ந்தேதி முதல்வர் திறந்து வைக்கிறார்.

6-ந்தேதி காந்திபுரம் பஸ் நிலையம் மத்திய சிறைச்சாலை மைதானத்தில் கலைஞர் நூற்றாண்டு நூலகம் மற்றும் அறிவியல் பூங்காவிற்கான அடிக்கல் நாட்டுகிறார். இந்த நூலகம் 7 தளங்களுடன் ஒரு லட்சத்து 98 ஆயிரம் சதுர அடி பரப்பளவில் அமைகிறது.முதல்வர் மு.க.ஸ்டாலின் அதிகமுறை சுற்றுப்பயணம் செய்த மாவட்டமாக கோவை இருக்கிறது. கோவைக்கு இன்னும் பல திட்டங்களை முதல்வர் வழங்க உள்ளார்.