பெரியகுளம் மலைமேல் பெரியநாயகி உடனுறை கைலாசநாதர் கோவிலில் சனிப்பிரதோஷம்

தேனி - பெரியகுளம் மலைமேல் பெரியநாயகி உடனுறை கைலாசநாதர் திருக்கோவிலில் சனிப்பிரதோஷம் வெகு விமர்சையாக கொண்டாடப்பட்டது. பிரதோஷத்தை முன்னிட்டு நந்தீஸ்வரருக்கு அபிஷேகங்கள் நடைபெற்றது. அதனை தொடர்ந்து கைலாசநாத சுவாமிகளுக்கு பால், தயிர், திருமஞ்சனம், பஞ்சாமிர்தம், தேன், இளநீர் உள்ளிட்ட அபிஷேகங்கள் செய்யப்பட்டு, சிறப்பு அலங்காரம் செய்யப்பட்டது.  பின்னர் உற்சவமூர்த்தி பக்தர்கள் புடைசூழ ஊர்வலமாக கோவிலை வலம் வந்ததை தொடர்ந்து மஹா தீபாராதனை நடைபெற்றது. ஏராளமான பக்தர்கள் சனிப்பிரதோஷ விழாவில் கலந்து கொண்டு கைலாசநாத சுவாமிகளையும், பெரியநாயகி அம்மனையும் தரிசனம் செய்தனர். இவ்விழாவில் கலந்து கொண்டவர்களுக்கு கட்டளைதாரர்கள் சார்பில் பிரசாதம் வழங்கப்பட்டது. இவ்விழாவிற்கான ஏற்பாடுகளை அன்பர் பணி செய்யும் பராமரிப்புக் குழு செயலாளர் சிவக்குமார், மற்றும் தெய்வேந்திரன் உள்ளிட்ட பலர் செய்திருந்தனர்.