புதுடெல்லி, மத்திய அரசு கேட்டுக்கொண்டதை அடுத்து இந்தியாவில் டிக் டாக் செயலி பதிவிறக்கத்தை கூகுள் பிளே ஸ்டோர் முடக்கியுள்ளது.
மதுரை ஐகோர்ட் தடை...
சீனாவின் டிக் டாக் வீடியோ செயலி ஆனது இந்தியாவில் இதுவரை 24 கோடி முறை பதிவிறக்கம் செய்யப்பட்டுள்ளது. ஆனால் டிக் டாக் செயலி மூலம் ஆபாசத்தை ஊக்குவிக்கும் வகையிலான வீடியோக்கள் பரப்பப்படுவதாக அதற்கு உயர்நீதிமன்ற மதுரைக்கிளை தடை விதித்தது. மேலும் டிக் டாக் செயலி பதிவிறக்கத்தை முடக்க நடவடிக்கை மேற்கொள்ளுமாறு மத்திய மின்னணுவியல் மற்றும் தகவல் தொழில்நுட்பத் துறைக்கு நீதிபதிகள் உத்தரவிட்டு இருந்தனர்.
டிக் டாக் முடக்கம்...
இந்த உத்தரவை எதிர்த்து உச்சநீதிமன்றத்தில் மேல்முறையீடு செய்யப்பட்டது. ஆனால் உயர்நீதிமன்ற மதுரைக்கிளையின் உத்தரவுக்கு தடை விதிக்க நீதிபதிகள் மறுத்து விட்டனர். இதைத் தொடர்ந்து டிக் டாக் செயலியை பதிவிறக்கம் செய்வதை முடக்குமாறு கூகுள் மற்றும் ஆப்பிள் நிறுவனங்களை மத்திய தகவல் தொழில்நுட்பத் துறை கேட்டுக் கொண்டிருந்தது. இதன் அடிப்படையில் கூகுள் பிளே ஸ்டோரில் டிக் டாக் முடக்கப்பட்டுள்ளது.
