லண்டன் : உலகக் கோப்பை இறுதிப் போட்டியில் வெற்றியை நிர்ணயிப்பதற்கு பவுண்டரி எண்ணிக்கை விதியை பயன்படுத்தியதை இந்திய அணியின் முன்னாள் வீரர் கவுதம் காம்பீர் கடுமையாக சாடியுள்ளார்.
உலகக் கோப்பை கிரிக்கெட் தொடரின் இறுதிப் போட்டியில் விளையாடிய இங்கிலாந்து, நியூசிலாந்து அணிகள் நிர்ணயிக்கப்பட்ட 50 ஓவர்களில் தலா 241 ரன்கள் எடுத்ததால் சூப்பர் ஓவர் முறை கடைப்பிடிக்கப்பட்டது. அதிலும், இரண்டு அணிகளும் சமமான ரன்களையே (15 ரன்கள்) எடுத்தன.
இதனால், பவுண்டரி எண்ணிக்கை அடிப்படையில் வெற்றி தீர்மானிக்கப்பட்டது. இந்த விதியின்படி போட்டியில் அதிக பவுண்டரிகள் அடித்த அணி வெற்றி பெற்றதாக அறிவிக்கப்படும். இந்த விதியின்படி, அதிக பவுண்டரிகள் அடித்த இங்கிலாந்து அணி (26) வெற்றி பெற்றதாக அறிவிக்கப்பட்டு, உலகக் கோப்பை வழங்கப்பட்டது. ஐ.சி.சி.யின் இந்த விதியால் நியூசிலாந்து அணியின் வெற்றிக் கனவு தகர்ந்தது.
இது குறித்து இந்திய அணியின் முன்னாள் வீரர் கவுதம் காம்பிர் தனது டுவிட்டர் பக்கத்தில், ஐ.சி.சி.யின் இந்த விதியை கடுமையாக சாடி உள்ளார்.இந்த விதியை பயன்படுத்தி எப்படி இறுதி முடிவு எடுத்தார்கள்? என்பது புரியவில்லை. ஐ.சி.சி.யின் இந்த விதி ஆபத்தமான விதி. போட்டி டையில் முடிந்திருப்பதால், கடைசி வரை சிறப்பாக விளையாடிய இரண்டு அணிகளுக்கும் நான் வாழ்த்து தெரிவிக்கிறேன். என்னைப் பொருத்தவரை இரண்டு அணிகளுமே வெற்றியாளர்கள்தான் என்று காம்பீர் கூறியுள்ளார்.
