கமலா ஹாரிஸூடன் செப். 4-ல் விவாதம் நடத்த தயார்: டிரம்ப்

வாஷிங்டன் : அதிகாரபூர்வ வேட்பாளராக அறிவிக்கப்பட்ட நிலையில் கமலா ஹாரிஸூடன் செப்டம்பர் 4-ல் டி.வி. சேனலின் நேரடி விவாத நிகழ்ச்சியில் பங்கேற்க தயாராக இருப்பதாக டிரம்ப் அறிவித்துள்ளார். 

அமெரிக்க அதிபர் தேர்தல் வரும் நவம்பர் 5-ம் தேதி நடக்க உள்ளது. இதில் ஆளும் ஜனநாயக கட்சி சார்பில் அதிபர் ஜோ பைடன் தேர்தல் களத்திலிருந்து விலகிய நிலையில், துணை அதிபர் கமலா ஹாரிஸ் போட்டியிடுகிறார். குடியரசு கட்சி சார்பில் முன்னாள் அதிபர் டொனால்ட் டிரம்ப் களமிறங்கி உள்ளார். 

இதற்கிடையே, ஜனநாயக கட்சி வேட்பாளராக கமலா ஹாரிஸ் அதிகாரப்பூர்வமாக  அறிவிக்கப்பட்டார். இதைத் தொடர்ந்து, கமலா ஹாரிசுடன் நேரடி விவாதம் நடத்த தயார் என டிரம்ப் அறிவித்துள்ளார்.

இது குறித்து அவர் தனது  ஊடக பதிவில், வரும் செப்டம்பர் 4-ம் தேதி டி.வி. சேனலின் நேரடி விவாத நிகழ்ச்சியில் கமலா ஹாரிசுடன் பங்கேற்க நான் தயாராக இருக்கிறேன் என கூறி உள்ளார். இதுவரை கமலா ஹாரிஸ் அதிகாரப்பூர்வ வேட்பாளராக அறிவிக்கப்படாமல் இருந்ததால் அவருடனான நேரடி விவாதத்தை டிரம்ப் புறக்கணித்து வந்தார். 

இந்நிலையில், அதிகாரபூர்வ வேட்பாளராக கமலா ஹாரிஸ் அறிவிக்கப்பட்டதும் சவாலை ஏற்றுள்ளார். ஏற்கனவே பிரசாரத்தில் கமலா ஹாரிசுக்கு எதிராக இனவெறி தாக்குதலை டிரம்ப் நடத்தி வரும் நிலையில் அவர்களின் நேரடி விவாத நிகழ்ச்சி பெரும் எதிர்பார்ப்பை ஏற்படுத்தி உள்ளது.