பாரீஸ் ஒலிம்பிக் - 2024 : மனு பாக்கருக்கு உற்சாக வரவேற்பு

33-வது ஒலிம்பிக் போட்டி பிரான்ஸ் தலைநகர் பாரீசில் நடந்து வருகிறது. 206 நாட்டு வீரர், வீராங்கனைகள் பங்கேற்றுள்ள இந்த விளையாட்டு திருவிழா இறுதிகட்டத்தை நெருங்கியுள்ளது. பாரீஸ் ஒலிம்பிக் போட்டியில் இந்தியா இதுவரை 3 (வெண்கலம்) பதக்கங்களை வென்றுள்ளது. இந்தநிலையில், பாரீஸ் ஒலிம்பிக்கில் இரட்டைப்பதக்கம் வென்று டெல்லி விமான நிலையம் வந்த மனு பாக்கருக்கு ரசிகர்கள், பொதுமக்கள் உற்சாக வரவேற்பு அளித்தனர். இது குறித்து மனு பாக்கர் கூறுகையில், இங்கே இவ்வளவு அன்பைப் பெற்றதில் நான் மிகவும் மகிழ்ச்சியடைகிறேன் என்றார். 10 மீ தனி நபர் ஏர் பிஸ்டல், 10 மீ, ஏர் மிஸ்டல் கலப்பு இரட்டையர் பிரிவில் மனு பாக்கர் வெண்கலம் வென்றிருந்தார்.

_________________________________________________________________________________________

இந்திய ஒலிம்பிக் சங்கம் விளக்கம்

மல்யுத்தம் பெண்கள் 50 கிலோ எடைப் பிரிவுக்கான அரையிறுதி போட்டியில், இந்திய வீராங்கனை வினேஷ் போகத், கியூபா வீராங்கனை குஸ்மானை வீழ்த்தி இறுதிசுற்றுக்கு தகுதி பெற்றார். இறுதிப் போட்டியில் இந்திய வீராங்கனை வினேஷ் போகத் அமெரிக்காவை சேர்ந்த சாரா ஹில்டெப்ரண்ட்-ஐ எதிர்கொள்ள இருந்தார். இந்த நிலையில், வினேஷ் போகத் உடல் எடை சில கிராம்கள் வரை கூடி இருப்பதால் அவர் தகுதி நீக்கம் செய்யப்பட்டதாக ஒலிம்பிக் கமிட்டி அறிவித்துள்ளது. இந்நிலையில் வினேஷ் போகத் தகுதி நீக்கம் செய்யப்பட்டது குறித்து இந்திய ஒலிம்பிக் சங்கத்தின் தலைவர் பி.டி. உஷா விளக்கம் அளித்து வீடியோ வெளியிட்டுள்ளார்.

அதில், "வினேஷ் போகத்தின் தகுதி நீக்கம் மிகவும் அதிர்ச்சியளிக்கிறது. ஒலிம்பிக் வில்லேஜ் கிளினிக்கில் அனுமதிக்கப்பட்டுள்ள போகத்த்தை சந்தித்து பேசினேன். இந்திய ஒலிம்பிக் சங்கமும் இந்திய அரசாங்கமும் அவளுக்கு முழுமையான ஆதரவை வழங்குவதாக உறுதியளித்தேன். நாங்கள் வினேஷ் போகத்திற்கு அனைத்து மருத்துவ மற்றும் உளவியல் ஆதரவை வழங்குகிறோம். வினேஷ் போகத்தின் தகுதி நீக்கத்திற்கு எதிராக இந்திய ஒலிம்பிக் சம்மேளனம் முறையீடு செய்துள்ளது" என்று அவர் தெரிவித்தார்.

_________________________________________________________________________________________

வினேஷ் போகத்துக்கு புகழாரம்

பி.வி.சிந்து தனது எக்ஸ் பக்கத்தில் கூறியதாவது: டியர் வினேஷ் போகத், எங்கள் கண்களுக்கு நீங்கள் எப்போதும் சாம்பியன்தான். நீங்கள் தங்கம் வெல்ல வேண்டுமென நான் மிகவும் நம்பியிருந்தேன். பிடிசிஎஸ்இ பயிற்சி மையத்தில் உங்களுடன் சிறிது நேரம் செலவிட்டிருக்கிறேன். ஒரு பெண் சூப்பர்ஹியூமன் ( மனித ஆற்றலுக்கு மேற்பட்ட) சக்தி உடன் சண்டையிடுவதைப் பார்க்க முடிந்தது. அது மிகவும் உற்சாகத்தை கொடுத்தது. நான் உங்களுக்காக எப்போதும் இருப்பேன். இந்த பிரபஞ்சத்தின் ஒட்டுமொத்த நல்லவற்றையும் உங்களது வழிக்கு அனுப்பி வைக்கிறேன் என்றார். இந்த ஒலிம்பிக்கில் பெரிதும் எதிர்பார்த்த பி.வி.சிந்தும் காலிறுதிக்கு முந்தைய சுற்றில் வெளியேறியது குறிப்பிடத்தக்கது.

_________________________________________________________________________________________

நியூசிலாந்து வீரரின் பதிவு வைரல் 

பாரீஸ் ஒலிம்பிக் போட்டியில் இந்திய மல்யுத்த வீராங்கனை வினேஷ் போகத் தகுதிநீக்கம் செய்யப்பட்ட நிலையில், நியூ ஸிலாந்து முன்னாள் கிரிக்கெட் வீரர் ஜிம்மி நீஷம் எக்ஸ் பதிவு தற்போது வைரலாகியிருக்கிறது. கடந்த 2019ஆம் ஆண்டு உலகக் கோப்பை கிரிக்கெட் போட்டியின்போது நியூ ஸிலாந்து அணி தோல்வியடைந்த நிலையில், ஜிம்மி நீஷம் தன்னுடைய எக்ஸ் பக்கத்தில் மேற்கொண்டிருந்தததுதான் அந்தப் பதிவு. அதில் அப்படி என்ன சொல்லியிருந்தாரோ, அது இப்போது படிக்கும்போது, இந்திய ரசிகர்களுக்கு சொல்லப்படுவதுபோலவே உள்ளது.

அவர் தன்னுடைய எக்ஸ் பக்கத்தில், குழந்தைகளே, விளையாட்டில் ஈடுபட வேண்டாம், கேக் செய்வது அல்லது வேறு எந்த வேலையையும் எடுத்துக்கொள்ளுங்கள். நன்கு உடல் கொழுத்து, மகிழ்ச்சியாக வாழ்ந்து 60 வயதில் இறந்துவிடலாம் என்று பதிவிட்டிருந்தார். 2019ஆம் ஆண்டு அவர் பதிவிட்டிருந்ததை, சமூக வலைதளங்களில் மக்கள் தற்போது தேடிப்பிடித்து வைரலாக்கி வருகிறார்கள்.

பாரீஸ் ஒலிம்பிக் போட்டியில், மகளிருக்கான மல்யுத்தத்தில், 100 கிராம் உடல் எடை கூடுதலாக இருந்ததற்காக, இந்திய மல்யுத்த வீராங்கனை வினேஷ் போகத் தகுதிநீக்கம் செய்யப்பட்டு, இந்தியர்களின் இதயங்களில் பேரடி தாக்கிய நிலையில்தான் இது வைரலாகியிருக்கிறது. 

_________________________________________________________________________________________

இந்திய பெண்கள் அணி தோல்வி

பாரீஸ் ஒலிம்பிக் டேபிள் டென்னிஸ் பெண்கள் அணிகள் பிரிவில் இந்தியா ஜெர்மனியை எதிர்கொண்டது. முதல் மேட்சில் ஸ்ரீஜா அகுலா- அர்ச்சனா கிரிஷ் கமத் ஜோடி ஜெர்மனியின் ஜியாவோனா ஷான்- யுயன் வான் ஜோடியை எதிர்கொண்டது. இதில் இந்திய ஜோடி 1-3 எனத் தோல்வியடைந்தது. 2-வது மேட்சில் மணிகா பத்ரா- ஜெர்மனியின் அன்னெத் கவ்மான் மோதினார்கள். இதில் மணிகா பத்ரா 1-3 எனத் தோல்வியடைந்தார். 3-வது மேட்சில் அர்ச்சனா கிரிஷ் கமத்- ஜியாவோனா ஜோடி விளையாடியது. இதில் அர்ச்சனா 3-1 என வெற்றி பெற்றார். 4-வது போட்டியில் ஸ்ரீஜா அகுலா- அன்னெட் கவ்மான் பலப்பரீட்சை நடத்தினர். இதில் ஸ்ரீஜா 0-3 எனத் தோல்வியடைந்தார். இதனால் இந்தியா 1-3 எனத் தோல்வியடைந்து வெளியேறியது. தடகளத்தில் பெண்களுக்கான 100 மீட்ர் தடை ஓட்டம் தகுதிச் சுற்றில் இந்திய வீராங்கனை ஜோதி யர்ராஜி ஏமாற்றம் அடைந்தார்.