பொதுத்தேர்வு முடிவுகள் வெளியீடு: தமிழகத்தில் 10-ம் வகுப்பில் 93.80 சதவீதம் பேர் தேர்ச்சி : 11-ம் வகுப்பில் 92.09% மாணவர்கள் தேர்ச்சி

சென்னை, பத்தாம் வகுப்பு பொதுத் தேர்வில் தேர்ச்சி விகிதத்தின்படி, 98.31% பெற்று சிவகங்கை மாவட்டம் முதலிடம் பிடித்துள்ளது. தொடர்ந்து விருதுநகர், தூத்துக்குடி, கன்னியாகுமரி, திருச்சி ஆகிய மாவட்டங்கள் அடுத்த 4 இடங்களைப் பிடித்துள்ளன. 11-ம் வகுப்பில் 92.09% மாணவர்கள் தேர்ச்சி பெற்றுள்ளனர்.

தமிழக பள்ளிக்கல்வி பாடத் திட்டத்தில் 10, 11-ம் வகுப்புக்கான பொதுத் தேர்வுகள் கடந்த மார்ச் 5 முதல் ஏப்ரல் 15-ம் தேதி வரை நடைபெற்றன. இதில் 10-ம் வகுப்பு தேர்வை சுமார் 9 லட்சம் பேரும், 11-ம் வகுப்பு தேர்வை சுமார் 8 லட்சம் பேரும் எழுதினர். விடைத்தாள் திருத்தும் பணி ஏப்ரல் 21-ல் தொடங்கி 30-ம் தேதியுடன் முடிவடைந்தது. தேர்வு முடிவுகள் மே 19-ம் தேதி வெளியிடப்படும் என்று ஏற்கெனவே அறிவிக்கப்பட்டிருந்த நிலையில், முன்கூட்டியே வெளியிட தேர்வுத் துறை முடிவு செய்தது. அதன்படி, 10, 11-ம் வகுப்பு தேர்வு முடிவுகளை சென்னையில் பள்ளிக்கல்வி துறை அமைச்சர் அன்பில் மகேஸ் நேற்று காலை 9 மணியளவில் வெளியிட்டார்.

தேர்வெழுதிய 12,290 மாற்றுத் திறனாளி மாணவர்களில் 11,409 பேரும் (92.83%), சிறைவாசிகளில் 237 பேரில் 230 பேரும் (97.05%) பேரும் தேர்ச்சி பெற்றுள்ளனர். மாற்று பாலினத்தைச் சேர்ந்த ஒருவர் தேர்வெழுதினார், அவரும் வெற்றி பெற்றுள்ளார். பள்ளிகள் வாரியான தேர்ச்சி விகிதம்: அரசுப் பள்ளிகளில் 91.26%, அரசு உதவி பெறும் பள்ளிகளில் 93.63% மற்றும் தனியார் சுயநிதிப் பள்ளிகளில் 97.99% தேர்ச்சி விகிதம் பதிவாகியுள்ளது.

தேர்வு முடிவுகளை https://results.digilocker.gov.in மற்றும் www.tnresults.nic.in http://www.tnresults.nic.in ஆகிய இணையதளங்களில் அறிந்து கொள்ளலாம். மாணவர்கள் தாங்கள் படித்த பள்ளிகள் மூலமாகவும் அறியலாம். பள்ளி மாணவர்கள், தனி தேர்வர்கள் பதிவு செய்த செல்போன் எண்ணுக்கு குறுஞ்செய்தியாகவும் அனுப்பப்படும். மாணவர்களின் மதிப்பெண் பட்டியலை www.dge.tn.gov.in எனும் வலைதளத்தில் பள்ளி தலைமை ஆசிரியர்கள் பதிவிறக்கம் செய்து கொள்ளலாம்.

230 சிறைவாசிகள் தேர்ச்சி: 

அதேபோல், 10-ம் வகுப்பு பொதுத்தேர்வெழுதிய 12,290 மாற்றுத் திறனாளி மாணவர்களில் 11,409 பேரும் (92.83%), சிறைவாசிகளில் 237 பேரில் 230 பேரும் (97.05%) பேரும் தேர்ச்சி பெற்றுள்ளனர். மாற்று பாலினத்தைச் சேர்ந்த ஒருவர் தேர்வெழுதினார், அவரும் வெற்றி பெற்றுள்ளார்.

11-ம் வகுப்பில் மொத்தம், 92.09 சதவீதம் மாணவ - மாணவியர் தேர்ச்சி பெற்றுள்ளனர். மாணவியர் 95.13 சதவீதமும், மாணவர்கள் 88.70 சதவீதமும் தேர்ச்சி அடைந்துள்ளனர். மாணவர்களைவிட மாணவியர் 6.43 சதவீதம் அதிகம் தேர்ச்சி பெற்றுள்ளனர். தேர்ச்சி விகிதத்தின்படி, அரியலூர், ஈரோடு, விருதுநகர், கோயம்புத்தூர், தூத்துக்குடி ஆகிய மாவட்டங்கள் முதல் ஐந்திடத்தில் உள்ளன. அரசுப் பள்ளிகளில் அதிக தேர்ச்சி விகிதம் பெற்ற முதல் ஐந்து மாவட்டங்களில் அரியலூர், ஈரோடு, நாகப்பட்டினம், விருதுநகர், சிவகங்கை மாவட்டங்கள் உள்ளன.

11-ம் வகுப்பு பொதுத்தேர்வில் பாடவாரியாக சதம் அடித்தவர்கள் எண்ணிக்கை: தமிழ் - 41, ஆங்கிலம் - 39, இயற்பியல் - 390, வேதியியல் - 593, உயிரியல் - 91, கணிதம் - 1338, தாவரவியல் - 4, விலங்கியல் - 2, கணினி அறிவியல் - 3535, வரலாறு -35, வணிகவியல் - 806, கணக்குப் பதிவியல் -111,பொருளியல் - 254, கணினிப் பயன்பாடுகள் - 761, வணிகக் கணிதம் மற்றும் புள்ளியியல் - 117. 11-ம் வகுப்பு பொதுத்தேர்வில் பாடப் பிரிவுகள் வாரியாக தேர்ச்சி விகிதம்: அறிவியல் பாடப் பிரிவுகள்: 95.08%, வணிகவியல் பாடப் பிரிவுகள்: 87.33%, கலைப் பிரிவுகள்: 77.94%, தொழிற்பாடப் பிரிவுகள்: 78.31%.

முதல் 5 மாவட்டங்கள்:

(10-ம் வகுப்பு)

1) சிவகங்கை - 98.31%.

2) விருதுநகர் - 97.45%.

3) தூத்துக்குடி - 96.76%.

4) கன்னியாகுமரி - 96.66%.

5) திருச்சி - 96.61%.

பாடவாரியாக தேர்ச்சி விகிதம்:

(10-ம் வகுப்பு)

1) தமிழ்: 98.09%.

2) ஆங்கிலம்: 99.46%.

3) கணிதம்: 96.57%.

4) அறிவியல்: 97.90%.

5) சமூக அறிவியல்: 98.49%

பாடவாரியாக சதம்:

(10-ம் வகுப்பு)

• 1) தமிழ்: 8.
• 2) ஆங்கிலம்: 346.
• 3) கணிதம்: 1996.
• 4) அறிவியல்: 10838.
• 5 சமூக அறிவியல்: 10256 பேர்.