கடல் திரைப்படத்துக்கு கிறிஸ்தவர்கள் எதிர்ப்பு - புகார்

சென்னை, பிப்.6: - இயக்குநர் மணிரத்னம் இயக்கத்தில் வெளிவந்துள்ள கடல் திரைப்படத்தில் கிறிஸ்தவர்களை இழிவுபடுத்தும் காட்சிகள் இருப்பதால், அந்த திரைப்படத்துக்கு எதிர்ப்பு தெரிவித்து 6 காட்சிகளை நீக்கக் கோரி சென்னை பெருநகர காவல் ஆணையர்  எஸ்.ஜார்ஜியிடம் இந்திய கிறிஸ்தவ ஜனநாயகக் கட்சியினர் திங்கள்கிழமை மனு கொடுத்தனர். அவர்கள் கொடுத்த மனுவில் கூறப்பட்டிருப்பதாவது:- மணிரத்னம் இயக்கத்தில்  அண்மையில் வெளிவந்துள்ள கடல் திரைப்படத்தில் கிறிஸ்தவர்களின் மனது புண்படும்படியாக 6 காட்சிகள் உள்ளன. பல இடங்களில்  பைபிள் வசனங்கள் தவறாகப் பயன்படுத்தப்பட்டுள்ளன. இதன் மூலம் கிறிஸ்தவர்களின் புனித நூலான பைபிள் கொச்சைப்படுத்தப்பட்டுள்ளது. அதேபோல கிறஸ்தவ பாதிரியார் பெர்க்மான்ஸை அவமதிக்கும் வகையிலும் இந்த திரைப்படத்தில் கதாபாத்திரங்கள் உள்ளன. எனவே இந்த திரைப்படத்துக்கு தடை விதிக்க காவல் துறை நடவடிக்கை எடுக்க வேண்டும். இல்லையெனில் படத்தில் கிறிஸ்தவர்களைப் புண்படுத்தும் வகையில் உள்ள 6 காட்சிகளை நீக்குவதற்குரிய  நடவடிக்கை எடுக்க வேண்டும்  என்று அதில் குறிப்பிடப்பட்டிருந்தது.