உள்ளாட்சி தேர்தல் முடிவு - 5வது இடத்தில் தே.மு.தி.க.

சென்னை, அக். 23 - நடந்து முடிந்த உள்ளாட்சி தேர்தலில் விஜயகாந்தின் தே.மு.தி.க. 5 வது இடத்திற்கு தள்ளப்பட்டுள்ளது. அ.தி.மு.க.வுக்கு அடுத்தபடியாக அதிகபட்ச இடங்களை தி.மு.க. கைப்பற்றியுள்ளது. இதன் மூலம் தமிழக அரசியல் களத்தில் அ.தி.மு.க, தி.மு.க. ஆகிய 2 கட்சிகளுக்குமே மக்கள் முன்னுரிமை கொடுத்துள்ளனர். இந்த இரு கட்சிகளுக்கும் மாற்றாக நாங்கள்தான் இருக்கிறோம் என்று தே.மு.தி.க. கட்சி தலைவர் விஜயகாந்த் பேசி வந்தார். ஆனால் அதனை தமிழக மக்கள் ஏற்கவில்லை என்பதை உள்ளாட்சி தேர்தல் முடிவுகள் உறுதிப்படுத்தி உள்ளன. தே.மு.தி.க.விற்கு இந்த தேர்தலில் கடும் வீழ்ச்சி ஏற்பட்டுள்ளது. தமிழ்நாட்டில் அடிமட்ட மக்களிடம் தே.மு.தி.க.விற்கு அமைப்பு ரீதியாக எந்த பலமும் இல்லை என்பதை இந்த தோல்வி காட்டுகிறது என்று அரசியல் நிபுணர்கள் கருத்து தெரிவித்துள்ளனர். கடந்த சட்டசபை தேர்தலை ஒப்பிட்டு பார்த்தால் தே.மு.தி.க.வின் செல்வாக்கு மக்களிடம் பெரும் பின்னடைவை ஏற்படுத்தி உள்ளது.