அரசு சாதனை விளக்க புகைப்படக் கண்காட்சியினை அமைச்சர் ஜி.பாஸ்கரன் திறந்து வைத்தார்

  சிவகங்கை. - சிவகங்கையில் மாவட்ட செய்தி மக்கள் தொடர்புத்துறையின் சார்பில் அமைக்கப்பட்ட அரசு சாதனை விளக்க புகைப்படக் கண்காட்சியினை மாவட்ட ஆட்சித்தலைவர்  க.லதா, தலைமையில், சிவகங்கை நாடாளுமன்ற உறுப்பினர் பிஆர்.செந்தில்நாதன் முன்னிலையில்,   கதர் மற்றும் கிராமத் தொழில்கள் வாரியத்துறை அமைச்சர் ஜி.பாஸ்கரன் திறந்து வைத்தார்.
            இப்புகைப்படக் கண்காட்சியில் தமிழக அரசின் அரசு நலத்திட்ட உதவிகள் வழங்கிய புகைப்படங்கள், முக்கிய நிகழ்வுகள் குறித்த புகைப்படங்கள், மாண்புமிகு அமைச்சர் பெருமக்கள் மற்றும் மாவட்ட ஆட்சித்தலைவர் ஆகியோர் மாவட்டத்தில் நடைபெற்ற அரசு விழாக்களில் நலத்திட்ட உதவிகள் வழங்கிய புகைப்படங்கள் இடம் பெற்றன. மேலும், இக்கண்காட்சியில் அரசு திட்டங்கள் குறித்தும், நலத்திட்டங்களின் பயன்கள் குறித்தும் ஏராளமான பொதுமக்கள் பார்த்து தெரிந்து கொண்டு சென்றனர்.
            அதனைத் தொடர்ந்து தமிழ்நாடு முதலமைச்சரின் சிவகங்கை மாவட்டத்தின் ஓராண்டு சாதனை விளக்க கையேட்டினை மாண்புமிகு கதர் மற்றும் கிராமத் தொழில்கள் வாரியத்துறை அமைச்சர் அவர்கள் பொதுமக்களுக்கு வழங்கினார். பின்னர் வேளாண் பொறியியல் துறையின் மூலம் 7  பயனாளிகளுக்கு ரூ.21 இலட்சம் மதிப்பீட்டில் வேளாண் உபகரணங்களை வழங்கினார். 
           இந்நிகழ்ச்சியில் மாவட்ட வருவாய் அலுவலர்  து.இளங்கோ, செய்தி மக்கள் தொடர்பு அலுவலர்  பாண்டி, சிவகங்கை வருவாய் கோட்டாட்சியர் (பொ)  இராமபிரதீபன், உதவி மக்கள் தொடர்பு அலுவலர் (செய்தி)  கருப்பணராஜவேல் மற்றும் அரசு அலுவலர்கள் உட்பட பலர் கலந்து கொண்டனர்.