கொரோனா தடுப்பு நடவடிக்கைகள் மேற்கொள்ள அமைக்கப்பட்ட 12 சிறப்பு ஐ.ஏ.எஸ். அதிகாரிகள் குழுவுடன் முதல்வர் எடப்பாடி பழனிசாமி நேற்று ஆலோசனை நடத்தினார்.
தமிழகத்தில் கொரோனா வைரஸ் ஊரடங்கு காலக் கட்டத்தில் மக்களுக்கு தேவையான அனைத்து அத்தியாவசிய சேவைகளும் தடையின்றி கிடைக்க ஐ.ஏ.எஸ். அதிகாரிகள் அடங்கிய 12 குழுக்களை தமிழக அரசு ஏற்படுத்தியுள்ளது. இக்குழுவினர் தங்கள் பணிகளை முழுவீச்சில் செய்து வருகின்றனர். எனினும் தமிழகத்தில் கொரோனா வைரஸ் பாதிப்பு நாளுக்கு நாள் அதிகரித்து வருகிறது.
இந்த நிலையில், கொரோனா தடுப்பு நடவடிக்கைகள் மேற்கொள்ள அமைக்கப்பட்ட 12 சிறப்பு ஐ.ஏ.எஸ். அதிகாரிகள் அடங்கிய குழுவுடன் முதல்வர் எடப்பாடி பழனிசாமி சென்னை, தலைமை செயலகத்தில் ஆலோசனை நடத்தினார். இந்த ஆலோசனை கூட்டத்தில், துணை முதல்வர் ஓ.பன்னீர் செல்வம், தலைமை செயலாளர் சண்முகம், சுகாதாரத்துறை செயலாளர் பீலா ராஜேஷ், 40-க்கும் மேற்பட்ட ஐ.ஏ.எஸ். அதிகாரிகள் பங்கேற்றனர்.
தமிழகத்தில் கொரோனா வைரஸ் பரவுவதை தடுக்க போடப்பட்டுள்ள ஊரடங்கு உத்தரவால் மக்களுக்கு அத்தியாவசிய பொருட்கள் தங்கு தடையின்றி கிடைப்பது தொடர்பாகவும், மேலும் எடுக்கப்பட வேண்டிய நடவடிக்கைகள் குறித்து இந்த கூட்டத்தில் ஆலோசனை நடத்தப்பட்டதாக தெரிகிறது.
