ராசிபுரம் - வேல் தூக்க வேண்டிய கட்டாயத்திற்கு ஸ்டாலின் தள்ளப்பட்டுள்ளார் என்று தமிழக பா.ஜ.க. தலைவர் எல்.முருகன் கூறினார்.
நாமக்கல் மாவட்டம் ராசிபுரத்தில் பா.ஜ.க. சார்பில் அணி பிரிவு மாநாடு நடைபெற்றது. இதில் தமிழக பா.ஜ.க. தலைவர் எல்.முருகன் கலந்து கொண்டார். மாநாட்டில் அவர் பேசியதாவது:-
தி.மு.க. தலைவர் ஸ்டாலினையே வேல் தூக்க வைத்ததுதான் பா.ஜ.க. நடத்திய வேல் யாத்திரையின் வெற்றி. முருகனின் வேலை ஸ்டாலின் ஏந்தியுள்ளார். மிக விரைவில் முருகனின் வேல் தி.மு.க.வை விரட்டியடிக்கும். வேல் தூக்க வேண்டிய கட்டாயத்திற்கு ஸ்டாலின் தள்ளப்பட்டுள்ளார். வரும் சட்டமன்றத் தேர்தலில் பா.ஜ.க.வினர் அதிகப்படியாக சட்டமன்றம் செல்வார்கள். தமிழகம் முழுவதும் பிப்ரவரி மாதத்தில் பா.ஜ.க. மாநாடு நடைபெறும்.
தமிழகத்தில் பா.ஜ.க. சார்பில் வேல் யாத்திரை நடத்தப்பட்டு அதன் மூலம் தைப்பூச விழாவிற்கு பொது விடுமுறை அளிக்க வேண்டும் என மாநில பா.ஜ.க. சார்பில் தமிழக அரசுக்கு கோரிக்கை வைக்கப்பட்டது. இதனை ஏற்று தமிழக அரசு தைப்பூச திருவிழாவை பொது விடுமுறை நாளாக அறிவித்தது வரவேற்புக்குரிய ஒன்றாகும். இதற்கு தமிழக அரசுக்கு நன்றியை தெரிவித்துக் கொள்கிறோம்.
இந்து மத வழிபாட்டை தவறாக பேசியவர்களுக்கு உரிய பாடம் வேல் யாத்திரை மூலம் புகட்டப்பட்டுள்ளது. தமிழகத்தில் பா.ஜ.க.வுக்கு மிகப்பெரிய ஆதரவு கிடைத்து வருகிறது. இவ்வாறு அவர் பேசினார்.
