மும்பை வீரருக்கு நோட்டீஸ்

 18-வது ஐ.பி.எல். டி20 கிரிக்கெட் தொடர் வருகிற 22-ம் தேதி தொடங்குகிறது. 10 அணிகள் பங்கேற்கும் இந்த கிரிக்கெட் தொடர் மே மாதம் 25-ம் தேதி வரை நடைபெறுகிறது. மும்பை இந்தியன்ஸ் அணியால் ரூ.75 லட்சத்திற்கு ஏலத்தில் எடுக்கப்பட்ட தென் ஆப்பிரிக்க வீரர் லிசாத் வில்லியம்ஸ் காயம் காரணமாக 2025 ஐ.பி.எல்.  தொடரில் இருந்து விலகினார். இவருக்கு பதிலாக மும்பை இந்தியன்ஸ் அணி மற்றொரு தென் ஆப்பிரிக்க வீரர் கார்பின் போஷ்-யை அவரது அடிப்படை ஏலத்தொகையான ரூ.75 லட்சத்திற்கு ஒப்பந்தம் செய்தது. 

ஐ.பி.எல். லில் விளையாடுவதற்காக கார்பின் போஷ் தனது பி.எஸ்.எல். ஒப்பந்தத்தை ரத்து செய்வார் என்று கூறப்படுகிறது. இந்நிலையில், தனது பாகிஸ்தான் சூப்பர் லீக்  ஒப்பந்தத்தை மீறியதாகக் கூறி, கார்பின் போஷ்க்கு பாகிஸ்தான் கிரிக்கெட் வாரியம்  நோட்டீஸ் அனுப்பியுள்ளது. ஐ.பி.எல்.  நடைபெறும் அதே நேரத்தில் தான் பாகிஸ்தான் சூப்பர் லீக் போட்டிகளும் நடைபெறுகிறது. 

____________________________________________________________________________________

ஐ.பி.எல்.: ஸ்ரேயா பங்கேற்பு?

 உலகின் பிரபலமான டி20 கிரிக்கெட் தொடர் ஐ.பி.எல். . இந்த தொடரின் 18-வது சீசன் வருகிற 22-ந் தேதி கொல்கத்தாவில் உள்ள ஈடன் கார்டன் மைதானத்தில் தொடங்குகிறது. கடந்த ஆண்டு நவம்பர் மாதம் மெகா ஏலம் நடைபெற்றது. இதில் ஒவ்வொரு அணியிலும் பல மாற்றங்கள் ஏற்பட்டுள்ளது. 5 அணிகளுக்கு புதிய கேப்டன்கள் நியமிக்கப்பட்டுள்ளனர். இதனால் இந்த தொடர் ரசிகர்களிடையே பெரிதும் எதிர்ப்பார்ப்பை ஏற்படுத்தி உள்ளது.

இந்நிலையில் இந்த தொடரின் தொடக்க நாளில் கலை நிகழ்ச்சிகள் மற்றும் இசை நிகழ்ச்சிகள் நடைபெறுவது வழக்கமான ஒன்று. அந்த வகையில் இந்த முறையும் பிரம்மாண்டமாக கலை நிகழ்ச்சிகள் நடத்த ஐ.பி.எல்.  நிர்வாகம் முடிவு செய்துள்ளது. கலை நிகழ்ச்சிகளில் பிரபல பாலிவுட் பின்னணி பாடகி ஸ்ரேயா கோஷல், நடிகை திஷா பதானி மற்றும் பஞ்சாபி பாப் பாடகர் கரண் அவுஜ்லா ஆகியோர் பங்கேற்க உள்ளதாக தகவல் வெளியாகி உள்ளது. ஆனால் இது குறித்து அதிகாரப்பூர்வ அறிவிப்பு ஏதுவும் வெளியாகவில்லை.

____________________________________________________________________________________

நசரியாவை முந்திய எம்பாப்பே

லா லீகா கால்பந்து தொடரில் கடந்த சனிக்கிழமை நடைபெற்ற ஆட்டத்தில் ரியல் மாட்ரிட் - வில்லார்ரியல் அணிகள் மோதின. இதில் ரியல் மாட்ரிட் 2-1 என்ற கோல் கணக்கில் வெற்றி பெற்றது. ரியல் மாட்ரிட் தரப்பில் நட்சத்திர வீரர் எம்பாப்பே 2 கோல்களையும் அடித்தார். வில்லார்ரியல் தரப்பில் ஜுவான் போய்த் மட்டுமே ஒரு கோல் அடித்தார்.

இந்த 2 கோல்களையும் சேர்த்து நடப்பு சீசனில் எம்பாப்பே அடித்த கோல்களின் எண்ணிக்கை 31 ஆக உயர்ந்தது. இதன் மூலம் ரியல் மாட்ரிட் அணிக்காக அறிமுக சீசனில் அதிக கோல் அடித்த வீரர்களின் பட்டியலில் 3-வது இடத்தில் இருந்த பிரேசில் முன்னாள் கால்பந்து வீரரன ரொனால்டோ நசரியாவை (30 கோல்கள்) பின்னுக்கு தள்ளி 3-வது இடத்தை பிடித்துள்ளார்.

____________________________________________________________________________________

பும்ரா குறித்து கோலி கருத்து

இந்திய கிரிக்கெட் அணியின் நட்சத்திர வீரரான விராட் கோலி கிரிக்கெட்டில் ஏராளமான உலக சாதனைகளை படைத்து வருகிறார். இந்திய அணி அண்மையில் முடிவடைந்த சாம்பியன்ஸ் டிராபியை வெல்வதில் முக்கிய பங்கினை ஆற்றினார். தற்போது ஐ.பி.எல். தொடருக்காக தயாராகி வரும் அவரிடம் சமீபத்திய பேட்டி ஒன்றில் நீங்கள் உங்களது கெரியரில் எதிர்கொண்ட கடினமான பந்துவீச்சாளர் யார்? என்று கேள்வி எழுப்பப்பட்டது.

அதற்கு பதிலளித்த அவர், "நான் எதிர்கொண்ட கடினமான பந்துவீச்சாளர் பும்ரா" என்று கூறினார். இது குறித்து மேலும் பேசிய அவர், "ஜஸ்பிரித் பும்ரா உலகின் அனைத்து வடிவங்களிலும் சிறந்த பந்துவீச்சாளர் என்பதில் எந்த சந்தேகமும் இல்லை. அவர் ஐ.பி.எல்.-ல் என்னை சில முறை அவுட்டாக்கியுள்ளார். நாங்கள் இருவரும் வலை பயிற்சியில் மோதிக்கொண்டால் கூட தீவிரமாக இருக்கும். குறிப்பாக ஐ.பி.எல். போல நாங்கள் வலை பயிற்சியில் மோதிக்கொள்வோம். அவர் வீசும் ஒவ்வொரு பந்தும் மைண்ட் கேம் போல இருக்கும்" என்று கூறினார்.