குஜராத் சட்டசபைக்கு 2-வது கட்ட தேர்தல் தேதி அறிவிப்பு

காந்திநகர்,நவ.24 - குஜராத் மாநில சட்டசபைக்கு 2-வது கட்ட தேர்தல் வரும் டிசம்பர் 17-ம் தேதி நடைபெறும் என்று தேர்தல் கமிஷன் அறிவித்துள்ளது.  குஜராத் மாநில சட்டசபையின் பதவிக்காலம் வரும் ஜனவரி 17-ம் தேதியுடன் முடிவடைகிறது. இதனையொட்டி மாநில 182 தொகுதிகளை கொண்ட சட்டசபைக்கு முதல் கட்டமாக 87 தொகுதிகளுக்கு தேர்தல் தேதி அறிவிக்கப்பட்டு பிரசாரம் தீவிரமாக நடந்து வருகிறது. 

இந்தநிலையில் 2-வது கட்டமாக 95 தொகுதிகளுக்கு தேர்தல் நடைபெறும் தேதியை தேர்தல் கமிஷன் அறிவித்துள்ளது. வேட்புமனுத்தாக்கல் நேற்றுமுதல் தொடங்கியது. வேட்புமனுத்தாக்கல் செய்ய கடைசி நாள் நவம்பர் 30-ம் தேதி. வேட்புமனு பரிசீலனை டிசம்பர் 1-ம் தேதி நடைபெறும். வேட்புமனுவை வாபஸ் வாங்க டிசம்பர் 3-ம் தேதியாகும். டிசம்பர் 17-ம் தேதி தேர்தல் நடைபெறும். டிசம்பர் 20-ம் தேதி ஓட்டுக்கள் எண்ணப்படும். டிசம்பர் 24-ம் தேதிக்குள் தேர்தல் பணிகள் முடிந்துவிடும். இரண்டு கட்ட தேர்தலிலும் 44 ஆயிரத்து 496 வாக்குச்சாவடிகள் அமைக்கப்பட்டுள்ளன. மாநிலத்தில் மொத்தம் 3 கோடியே 76 லட்சத்து 590 வாக்காளர்கள் உள்ளனர்.