புது டெல்லி,ஜன. 16 - 4 விஞ்ஞானிகளுக்கு வாழ்நாள் சாதனையாளர் விருதை பிரதமர் மன்மோகன்சிங் நேற்று வழங்கி கவுரவித்தார். அணுசக்தி துறையால் வழங்கப்பட்ட இந்த விருதுகளை பிரதமர் வழங்கினார். இவர்களில் ஒருவர் ரவிபூஷன் குரோவர். இவர் இந்திய, அமெரிக்க அணுசக்தி ஒப்பந்தம் தொடர்பாக நடந்த பேச்சுவார்த்தையில் முக்கிய பங்கு வகித்தவர். மற்றொருவர் பலராம மூர்த்தி. இவர் அழிவில்லாத பல தொழில்நுட்பங்களை சோதனை நடத்தி பார்த்தவர். மற்றொருவர் கணித மேதை ஆர். பாலசுப்பிரமணியன். நான்காவது நபர் எஸ்.கே. சிக்கா. இவர் 1974 மற்றும் 1998 ம் ஆண்டுகளில் நடந்த அணு ஆயுத சோதனைகளில் முக்கிய பங்காற்றியவர். மேற்கண்ட நால்வருக்கும் பிரதமர் மன்மோகன்சிங் வாழ்நாள் சாதனையாளர் விருதை தனது அலுவலக இல்லத்தில் நடந்த நிகழ்ச்சி ஒன்றில் நேற்று காலை வழங்கி கவுரவித்தார்.