டேவிட் மற்றும் கடல் திரைப்படத்தை தடைசெய்யக்கோரி புகார்

சென்னை, பிப்.14 - சமீபத்தில் ரிலீஸ் செய்யப்பட்ட டேவிட் மற்றும் கடல் படத்தை தடை செய்யக்கோரி மூன்று கிறிஸ்துவ அமைப்புகள் புகார் போலீஸ் கமிஷ்னரிடம்  மனு அளித்தனர். மனுவில் கூறியிருப்பதாவது:-

டேவிட் மற்றும் கடல் ஆகிய சினிமா படங்களில் கிறிஸ்தவ மதத்தை இழிவுப்படுத்தி எடுக்கப்பட்ட காட்சிகள் உள்ளன. அதே சினிமாவில் கிறிஸ்து மதம் குறித்து தவறான வசனங்களையெல்லாம் உட்புகுத்தப்பட்டுள்ளது. அவற்றை நாங்கள் கண்டிக்கிறோம்.

தற்போது திரை அரங்குகளில் ஓடிக்கொண்டிருக்கும் டேவிட் திரைப்படத்தில் மதுபானத்தை ஊற்றி அதை மெழுகுவர்த்தி சுடரினால் கொளுத்துவது போன்ற காட்சிகள் படமாக்கப்பட்டுள்ளது. அதே போல் ஒரு கிறிஸ்தவன் எப்போதுமே குடித்துக் கொண்டிருப்பதை போலவும், கிறிஸ்துமஸ் தாத்தா என்று உலக மக்களால் போற்றி வாஞ்சையோடு போற்றப்படும் சான்டாகுரூஸ் கேரக்டரை அதே டேவிட் படத்தில் புகுத்தி கிறுக்கு சாண்டா என்று பல கட்டங்களில் கிறிஸ்மஸ் தாத்தாவை இழிவுப்படுத்தி வசனம் பேசுகிறார்கள். உலகம் போற்றும் கிறிஸ்தவ மதத்துக்கு எதிராக தவறான பிரச்சாரத்தை மேற்கொண்டிருக்கும் டேவிட் மற்றும் கடல் திரைப்படம் எடுக்க காரணமானவர்கள் மீதும் திரைப்படம் வெளியாக காரணமானவர்கள் மீதும் நடவடிக்கை எடுக்க வேண்டும் என்று கேட்டுக்கொள்கிறோம்.

இவ்வாறு அகில இந்திய ஜனநாயக மக்கள் கட்சி தி.குளோபல் கிறிஸ்டியன் சர்ச் ஆப் இந்தியா ஆகியோர் புகார் தெரிவித்தனர். அகில இந்திய ஜனநாயக மக்கள் கட்சியின் நிறுவன தலைவர் டாக்டர் ஐசக் அய்யா தலைமையில் சுமார் 30 -க்கும் மேற்பட்டோர்  கமிஷ்னர் அலுவலகத்திற்கு வந்தனர்.