புதுடெல்லி : எல்லைக் கட்டுப்பாட்டுப் பகுதியில் இந்தியா சீனா இடையே என்ன நடக்கிறது என்பது குறித்து மக்களுக்கு மத்திய அரசு தெளிவுபடுத்த வேண்டும் என்று காங்கிரஸ் எம்.பி. ராகுல் காந்தி வலியுறுத்தியுள்ளார்.
லடாக்கில் உள்ள தவுலத் பெக் ஓல்டே எனும் இடத்தில் இந்தியா பாலம் கட்டி வருகிறது. இதற்கு சீனா தரப்பில் எதிர்ப்பு தெரிவிக்கப்பட்டுள்ளது. இதனால், லடாக் யூனியன் பிரதேசத்தில் உள்ள இந்தியா - சீனா எல்லைப் பகுதியியில் கடந்த சிலநாட்களாக சீன ராணுவம் 6 ஆயிரத்துக்கும் மேற்பட்ட ராணுவ வீரர்களைக் குவித்துள்ளது. பதிலுக்கு இந்தியாவும் ஏராளமான ராணுவ வீரர்களைக் குவித்துள்ளது. இதனால் இரு நாடுகளுக்கு இடையே பதற்றமான சூழல் ஏற்பட்டுள்ளது.
இந்த நிலையில் காங்கிரஸ் கட்சியின் முன்னாள் தலைவரும், எம்.பி.யுமான ராகுல் காந்தி டுவிட்டரில் நேற்று பதிவிட்டுள்ளதாவது,
இந்தியா - சீனா எல்லைப் பகுதியில் உள்ள எல்லைக் கட்டுப்பாட்டுப் பகுதியில் என்ன நடக்கிறது. எல்லைப் பகுதியில் நடப்பது குறி்த்து மத்திய அரசு மவுனம் காப்பது நெருக்கடியான இந்நேரத்தில் பல்வேறு சந்தேகங்களையும், நிச்சயமற்றதன்மையையும் ஏற்படுத்துகிறது. உண்மையில் எல்லையில் என்ன நடக்கிறது என்பது குறித்து மக்களுக்கு, உண்மையான முறையில் மத்தியஅரசு தெளிவுபடுத்த வேண்டும். இவ்வாறு ராகுல் அதில் தெரிவித்துள்ளார்.
