இன்னும் மூன்றே தினங்கள்: டோக்கியோவில் பயிற்சியை தொடங்கிய இந்திய வீரர்கள்

டோக்கியோ: ஒலிம்பிக் போட்டியில் பங்கேற்பதற்காக டோக்கியோவுக்குச் சென்றுள்ள இந்திய வீரர்கள் நேற்று முதல் தங்களுடைய பயிற்சிகளைத் தொடங்கியுள்ளனர்.

228 பேர் குழு... 

32-வது ஒலிம்பிக் போட்டி வரும் 23-ம் தேதி முதல் தொடங்கவுள்ளன. இந்தியத் தரப்பில் 228 பேர் கொண்ட குழு ஒலிம்பிக்கில் பங்கேற்கிறது. டோக்கியோ ஒலிம்பிக்ஸ் போட்டியில் இந்தியாவின் 22 மாநிலங்களைச் சேர்ந்த 119 பேர் பங்கேற்கிறார்கள். இவர்களில் 67 வீரர்களும் 52 வீராங்கனைகளும் உள்ளார்கள். 18 விளையாட்டுகளில் 85 பதக்கங்கள் கொண்ட போட்டிகளில் இந்திய அணி பங்கேற்கிறது. 

தமிழக வீரர்கள்... 

டோக்கியோ ஒலிம்பிக்ஸ் போட்டியில் நேத்ரா குமணன், வருண் ஏ. தக்கார், கே.சி. கணபதி, ஜி. சத்யன், ஷரத் கமல், சி.ஏ. பவானி தேவி, ரேவதி வீரமணி, சுபா வெங்கடேசன், எஸ். தனலட்சுமி, ஆரோக்கிய ராஜீவ், நாகநாதன் பாண்டி என 11 தமிழக வீரர்கள் பங்கேற்கிறார்கள். 

88 பேர் குழு...

முதற்கட்டமாக 88 பேர் கொண்ட இந்திய குழு, சனிக்கிழமை புதுடெல்லியில் இருந்து புறப்பட்டு, ஞாயிற்றுக்கிழமை டோக்கியோ சென்றைடைந்தது. அவர்களை மத்திய விளையாட்டுத் துறை அமைச்சர் அனுராக் தாக்குர், இந்திய ஒலிம்பிக் சங்கத் தலைவர் நரீந்தர் பத்ரா, செயலர் ராஜீவ் பாட்டியா ஆகியோர் வழியனுப்பினர். 

துப்பாக்கிச் சுடும்...

ஏற்கெனவே குரோஷியாவில் பயிற்சி பெற்று வந்த இந்திய துப்பாக்கி சுடும் அணியினர் டோக்கியோ வந்து விட்டனர். ஞாயிற்றுக்கிழமை டோக்கியோ வந்த அணியில் வில்வித்தை, பாட்மிண்டன், டேபிள் டென்னிஸ், ஹாக்கி, ஜூடோ, ஜிம்னாஸ்டிக்ஸ், நீச்சல் வீரர், வீராங்கனைகள் அடங்குவர்.

வில்வித்தை வீரர்... 

இந்திய வீரர்கள் டோக்கியோவில் தங்கள் பயிற்சியைத் தொடங்கியுள்ளார்கள். வில்வித்தை விளையாட்டைச் சேர்ந்த அடானு தாஸ் - தீபிகா குமாரி தம்பதி டோக்கியோவில் தங்களுடைய பயிற்சியை நேற்று மேற்கொண்டனர். ஜூலை 23 முதல் வில்வித்தைப் போட்டிகள் தொடங்குகின்றன. தீபிகா குமாரி தனது 3-வது ஒலிம்பிக் போட்டியில் பங்கேற்கிறார். இதேபோல டென்னிஸ், டேபிள் டென்னிஸ் போட்டிகளில் பங்கேற்கும் இந்திய வீரர், வீராங்கனைகளும் தங்களுடைய பயிற்சிகளை நேற்று முதல் தொடங்கினர்.