76-வது மாநில நீச்சல் போட்டி: முதல் நாளில் 4 புதிய சாதனை

சென்னை: மாநில நீச்சல் போட்டியின் முதல் நாளில் 4 புதிய சாதனை படைக்கப்பட்டுள்ளது.  200 மீட்டர் பிரஸ்டிரோக் பிரிவில் தனுஷ் புதிய சாதனை நிகழ்த்தினார். தனுஷ் பந்தய தூரத்தை 2 நிமிடம் 21.60 வினாடியில் கடந்து தனது பழைய சாதனையை முறியடித்தார்.

சீனியர் நீச்சல் போட்டி...

தமிழ்நாடு நீச்சல் சங்கம் சார்பில் 76-வது மாநில சீனியர் நீச்சல் சாம்பியன் ஷிப் போட்டி சென்னை வேளச்சேரியில் உள்ள எஸ்.டி.ஏ.டி. நீச்சல் வளாகத்தில் தொடங்கியது. இந்த போட்டியில் மாநிலம் முழுவதும் இருந்து 250 வீரர், வீராங்கனைகள் பங்கேற்றனர். இந்த போட்டியின் அடிப்படையில் செப்டம்பர் 6 முதல் 10-ந்தேதி வரை அசாம் தலைநகர் கவுகாத்தியில் நடைபெறும் தேசிய சீனியர் நீச்சல் போட்டிக்கான தமிழக அணி தேர்வு செய்யப்படும்.

4 புதிய சாதனை... 

தொடக்க நாளில் 4 புதிய சாதனை நிகழ்த்தப்பட்டது. ஆண்களுக்கான 50 மீட்டர் பிரஸ்டிரோக் பிரிவில் தனுஷ் சுரேஷ் 29.23 வினாடியில் கடந்து புதிய சாதனை படைத்தார். 2011-ம் ஆண்டில் சர்வதேச வீரர் ஜே.அக்னீஸ்வர் 29.52 வினாடியில் கடந்ததே சாதனையாக இருந்தது. இதை தனுஷ் முறியடித்தார். இதே போல 200 மீட்டர் பிரஸ்டிரோக் பிரிவில் தனுஷ் புதிய சாதனை நிகழ்த்தினார். அவர் பந்தய தூரத்தை 2 நிமிடம் 21.60 வினாடியில் கடந்து தனது பழைய சாதனையை முறியடித்தார். இதற்கு முன்பு 2019-ல் அவர் 2 நிமிடம் 21.71 வினாடியில் கடந்ததே சாதனையாக இருந்தது.

பெனடிக்டன் ரோகித்... 

முதல் நாளில் தனுஷ் 2 புதிய போட்டி (மீட்) சாதனை புரிந்தார். இதே போல ஆண்களுக்கான 100 மீட்டர் பட்டர் பிளை நீச்சலில் டி.ஆதித்யா 56.93 வினாடியில் கடந்து புதிய சாதனை படைத்தார். இதற்கு முன்பு 2016-ம் ஆண்டில் அரவிந்த் 57.00 வினாடியில் கடந்ததே சாதனையாக இருந்தது. மேலும் ஆண்களுக்கான 50 மீட்டர் பட்டர் பிளை பிரிவில் பெனடிக்டன் ரோகித் 25.47 வினாடியில் நீந்தி புதிய சாதனை புரிந்தார். இதற்கு முன்பு 2020-ல் வினாயக் 25.55 வினாடியில் கடந்ததே சாதனையாக இருந்தது.

பேக்ஸ்டிரோக் பிரிவு... 

400 மீட்டர் பிரீஸ்டைலில் சத்யசாய் கிருஷ்ணன், மான்யா முக்தா, 200 மீட்டர் தனி நபர் மெட்லி பிரிவில் பெனடிக்டன் ரோகித், சக்தி, 50 மீட்டர் பிரஸ்டிரேக் பெண்கள் பிரிவில் ஸ்ரீயா இஸ்வர், 200 மீட்டர் பேக்ஸ்டிரோக் பிரிவில் நிதிக், மதுமிதா ஆகியோர் முதல் இடத்தை பிடித்தனர். முதல் நாள் போட்டியில் புதிய சாதனை படைத்தவர்களை மாநில நீச்சல் சங்க செயலாளர் டி.சந்திர சேகரன், துணை தலைவர் முகுந்தன், பொருளாளர் முரளிதரன் ஆகியோர் பாராட்டினார்கள்.