தீ விபத்தில் மரணமடைந்தவருக்கு ரூ.1 லட்சம் நிதியுதவி

சென்னை, டிச.15 - தீவிபத்தில் மரணமடைந்த காஞ்சிபுரம் மாவட்டத்தைச் சேர்ந்தவருக்கு ரூபாய் ஒரு லட்சம் வழங்க முதல்வர் ஜெயலலிதா உத்தரவிட்டுள்ளார். இதுகுறித்து முதல்வர் ஜெயலலிதா வெளியிட்டுள்ள அறிக்கையில்  கூறியிருப்பதாவது:-

காஞ்சிபுரம் மாவட்டம், ஆலந்தூர் வட்டம், ஆதம்பாக்கம் கிராமம், வ.உ.சி. நகரில் 8.12.2011 அன்று ஏற்பட்ட தீ விபத்தில் கண்ணன் என்பவருக்கு பலத்த தீக்காயங்கள் ஏற்பட்டு, மருத்துவமனையில் அனுமதிக்கப்பட்டு சிகிச்சைப் பெற்று வந்த நிலையில், சிகிச்சை பலனின்றி 11.12.2011 அன்று உயிரிழந்தார் என்ற செய்தியை அறிந்து நான் மிகவும் துயருற்றேன்.           

இவ்விபத்தில் அகால மரணமடைந்த கண்ணன் குடும்பத்தினருக்கு எனது ஆழ்ந்த இரங்கலையும், அனுதாபத்தையும் தெரிவித்துக் கொள்கிறேன். மேலும், இந்தத்  துயரச் சம்பவத்தில் உயிரிழந்த கண்ணன் குடும்பத்திற்கு முதலமைச்சரின் பொது நிவாரண நிதியிலிருந்து ஒரு லட்சம் ரூபாய்  வழங்க நான் உத்தரவிட்டுள்ளேன்.    

இவ்வாறு முதல்வர் ஜெயலலிதா அறிக்கையில் கூறியுள்ளார்.