புதிய கல்விக்கொள்கை: முதல்வர் எடப்பாடி பழனிசாமி ஆலோசனை

சென்னை : புதிய கல்விக்கொள்கை, பள்ளிகளை திறப்பது தொடர்பாக முதல்வர் எடப்பாடி பழனிசாமி ஆலோசனை நடத்தினார். 

புதிய கல்விக்கொள்கையின் வரைவு அறிக்கையை கஸ்தூரிரங்கன் தலைமையிலான குழு மத்திய அரசிடம் மே மாதம் சமர்ப்பித்தது. அதன்பின்னர், பொதுமக்களின் கருத்துகள் கேட்பதற்காக வெளியிடப்பட்டது. அதுகுறித்து கல்வியாளர்கள் மற்றும் பல்வேறு தரப்பினர் கருத்துகளை மத்திய அரசுக்கு தெரிவித்தனர்.

அதன் தொடர்ச்சியாக மத்திய அமைச்சரவை இந்த புதிய கல்விக்கொள்கைக்கு ஒப்புதல் அளித்துள்ளது. இந்த கல்விக்கொள்கை குறித்து பிரதமர் நரேந்திரமோடி பேசுகையில், கல்விக்கொள்கை மூலம் இந்தியாவில் கற்பித்தலில் சீர்திருத்தம் கொண்டு வரப்பட்டுள்ளது.

நாடு முழுவதும் ஒரே மாதிரியான கல்வி கிடைக்க செய்கிறது. புதிய கல்விக் கொள்கையில் தாய்மொழிக்கு முக்கியத்துவம் அளிக்கப்பட்டுள்ளது என்பது உள்பட பல்வேறு விஷயங்களை கூறினார்.

தமிழகத்தில் மத்திய அரசின் புதிய கல்விக் கொள்கைக்கு பல அரசியல் கட்சிகள் பல்வேறு கருத்துகளை முன்வைத்து வருகின்றனர். இந்த நிலையில் புதிய கல்விக்கொள்கை மற்றும் பள்ளிகளை திறப்பது எப்போது என்பது தொடர்பாக சென்னை தலைமை செயலகத்தில் முதல்வர்  எடப்பாடி பழனிசாமி ஆலோசனை நடத்தினார். 

இதில் துணை முதல்வர் ஓ.பன்னீர்செல்வம், அமைச்சர்கள் திண்டுக்கல் சீனிவாசன், எஸ்.பி.வேலுமணி, தங்கமணி, செங்கோட்டையன், கே.பி.அன்பழகன், தலைமை செயலாளர் சண்முகம், முதல்வரின் செயலாளர்களில் கல்வித்துறையை கவனித்துக் கொண்டு இருக்கும் எஸ்.விஜயகுமார், உயர்கல்வித்துறை முதன்மை செயலாளர் அபூர்வா, பள்ளிக்கல்வி துறை செயலாளர் தீரஜ்குமார் ஆகியோர் கலந்து கொண்டனர்.