மீண்டும் களமிறங்கிய ராமராஜன்

எட்செட்ரா என்டர்டெயின்மென்ட் சார்பில் V.மதியழகன் தயாரிக்கும் படம் சாமான்யன். பத்து வருட இடைவெளிக்குப் பிறகு மக்கள் நாயகன் ராமராஜன் இந்தப்படத்தின் மூலம் கதாநாயகனாகவே தமிழ் சினிமாவில் மறுபிரவேசம் செய்கிறார். இந்த படத்தை ராகேஷ் இயக்குகிறார். நாயகியாக நக்சா சரண், முக்கிய வேடத்தில் ராதாரவி, எம்.எஸ்.பாஸ்கர், ராஜாராணி பாண்டியன், மைம் கோபி உள்ளிட்ட பலர் நடிக்கின்றனர். தமிழ் உள்ளிட்ட ஐந்து மொழிகளில் தயாராக உள்ள இந்த படத்தின் டைட்டில் வெளியான நிலையில் படத்தின் டீசர் வெளியீட்டு விழா சமீபத்தில் நடைபெற்றது. அதில் பேசிய நடிகர் ராமராஜன்,  நடித்தால் ஹீரோவாகத்தான் நடிப்பேன் என்பதில் உறுதியாக இருந்தேன். நான்  ஹீரோ என்பதைவிட  கதையும் திரைக்கதையும் தான் ஹீரோ என்று சொல்லலாம். இந்த படத்தின் டீசரை பார்த்துவிட்டு ராமராஜன் துப்பாக்கி புடிச்சு என்ன பண்ணப்போறார் என்று பலரும் கேட்பார்கள், அதற்கான விடை இந்த படத்தில் இருக்கிறது என்றார். எவ்வளவு கோடி கொடுத்தாலும் தரம் கெட்டுப்போய் மோசமான படங்களில் நடிக்க மாட்டேன் என்பதில் உறுதியாக இருந்தேன், அதேபோல் புகை பிடிப்பதும் மது அருந்துவதும் தனக்கு பிடிக்காது ஒன்று என்றார்.