பூஜையுடன் தொடங்கிய சதுரங்க ஆட்டம் ஆரம்பம் படப்பிடிப்பு

வி.வி.எஸ் சுப்ரீம் பிலிம்ஸ் சார்பில் வினோத் வி.சர்மா தயாரிப்பில் உருவாகும் படம் சதுரங்க ஆட்டம் ஆரம்பம். M.V.ராமச்சந்திரன் இயக்குனராக அறிமுகமாகும் இந்த படத்தில் அஜய் கதாநாயகனாக நடிக்கிறார்.

கதாநாயகியாக சோனியா நடிக்க முக்கிய வேடத்தில் முருகா அசோக்குமார் நடிக்கிறார். இந்தப்படத்தின் பூஜை சமீபத்தில் நடைபெற்றது. இதில் சிறப்பு விருந்தினராக இயக்குநர் பேரரசு, நடிகர் ஆர்.அரவிந்தராஜ், சக்திகுமார், லொள்ளு சபா மாறன் உள்ளிட்ட பலர் கலந்து கொண்டனர்.

அப்போது இயக்குநர் பேரரசு பேசுகையில், இன்றைக்கு ஓப்பனிங் என்பது ஒரு நான்கைந்து ஹீரோக்களுக்கு மட்டும் தான் இருக்கிறது. மற்றபடி என்ன தான் பெரிய பட்ஜெட்டில் படம் எடுத்தாலும் வேறு பெரிய ஹீரோக்கள் நடித்தாலும் மக்களுக்கு பிடித்திருந்தால் தான் அந்த படம் வெற்றி அடைகிறது.

அன்று ஒரு படம் பரவாயில்லை என்று சொல்லப்பட்டாலே அது கிட்டத்தட்ட வெற்றி படம் போல தான். ஓரளவுக்கு வசூல் செய்து விடும். ஆனால் இப்போது நிலைமை வேறாக உள்ளது. ஒரு முதல் படத்தின் இயக்குநராக நாம் மிகப்பெரிய வெற்றியை பெறுகிறோம் என்பதைவிட நம்மை நம்பிய தயாரிப்பாளரின் நம்பிக்கையை முதலில் காப்பாற்ற வேண்டும் என்றார்.