துணைவேந்தர்கள் நியமன விவகாரத்தில் கவர்னரின் நோக்கம் நிறைவேறாது: அமைச்சர் கோவி. செழியன் பேச்சு

தஞ்சாவூர்: பல்கலைக்கழகங்களில் துணைவேந்தர்கள் நியமன விவகாரத்தில் தமிழக கவர்னரின் நோக்கம் ஒருபோதும் நிறைவேறாது என்று அமைச்சர் கோவி. செழியன் பேசினார்.

தஞ்சாவூர் அருகே இராராமுத்திரைக் கோட்டை ஊராட்சியில் நேற்று புதிய பொது விநியோக கட்டிடத்தை உயர் கல்வித்துறை அமைச்சர் கோவி.செழியன் திறந்து வைத்தார். பின்னர் அவர் நிருபர்களுக்கு அளித்த பேட்டியில் கூறியதாவது:- பல்கலை கழக துணைவேந்தர் நியமனத்தில் கவர்னரின் செயல்பாடு என்ன என்பதை இந்தியா உற்று நோக்குகிறது. ஒவ்வொரு மாநில கவர்னர்களுக்கும் உரிமை என்ன, கடமை என்ன என்பதை அரசியலமைப்பு சட்டம் பல்வேறு நெறிமுறைகளில் சொல்லி இருக்கிறது. அதை மீறும் வகையில் துணைவேந்தர் பதவி நிரப்பப்படாமல் உள்ளது.

மூன்று உறுப்பினர்கள் தேர்வுக் குழு என்பதை நான்காக அதிகரிப்பதன் மூலம் அதை செயல்படாமல் தடுப்பது கவர்னரின் நோக்கமாக உள்ளது. இது ஒருபோதும் நிறைவேறாது. முறைப்படி எல்லா நடவடிக்கையும் எடுக்கப்பட்டு துணைவேந்தர் பணி நியமனம் செய்யபடும். மாணவர்களின் நலனில் எதிர்க்கட்சியினர் அரசியல் செய்ய வேண்டாம். மாணவர்கள் நலன் கருதி சிந்திக்கின்ற செயல்படுகின்ற முதலமைச்சர் நமது தமிழக முதல்வர் மட்டும்தான்.இவ்வாறு அவர் கூறினார்.