மாநகராட்சிகள், நகராட்சிகள், பேரூராட்சிகள் எல்லை விரிவாக்கம்: ஆட்சேபனைகளை தெரிவிக்க ஆறு வாரங்கள் காலஅவகாசம்

சென்னை : மாநகராட்சிகள், நகராட்சிகள், பேரூராட்சிகள் எல்லை விரிவாக்கம் தொடர்பான ஆட்சேபனைகளை தெரிவிக்க ஆறு வாரங்கள் காலஅவகாசம் அளிக்கப்பட்டுள்ளது.

தமிழ்நாட்டில் மாநகராட்சிகள், நகராட்சிகள், பேரூராட்சிகளின் எல்லையை விரிவாக்கம் செய்து தமிழக அரசு மறுசீரமைப்பு மேற்கொள்ள உத்தேசப்பட்டியல் தயாரித்துள்ளது. இதன்படி மாநகராட்சி பகுதிகளை ஒட்டிய பஞ்சாயத்துக்கள் சிலவற்றை இணைக்க முடிவு செய்யப்பட்டுள்ளது. அதேபோல் நகராட்சி பகுதிகளில் உள்ள சில பஞ்சாயத்துகள் அந்தந்த நகராட்சிகளுடன் இணைய உள்ளது. மொத்தத்தில் 16 மாநகராட்சிகளுடன் 4 நகராட்சிகள், 5 பேரூராட்சிகள் மற்றும் 149 ஊராட்சிகள் இணைய இருக்கிறது. இதுதவிர புதிதாக 13 நகராட்சிகள் உருவாக உள்ளது. இதற்கு பல ஊராட்சிகளில் எதிர்ப்பு கிளம்பி உள்ளது. ஆனாலும் இதுதொடர்பாக 5 அரசாணைகளை அரசு வெளியிட்டுள்ளது.

இந்த அரசாணைகளை அரசிதழில் வெளியிட்டுள்ள தமிழக அரசு இதுதொடர்பான ஆட்சேபனைகளை 6 வாரங்களில் தெரிவிக்கலாம் என்று அறிவித்துள்ளது. இதன்படி முதன்மைச் செயலாளர், நகராட்சி நிர்வாகம் மற்றும் குடிநீர் வழங்கல் துறை தலைமை செயலகம், புனித ஜார்ஜ் கோட்டை என்ற முகவரிக்கு ஆட்சேபனைகளை அனுப்பலாம் என்று தமிழக அரசு அறிவித்துள்ளது.