மாடுபிடி வீரர்களை தேர்வு செய்வதில் பாரபட்சம்: ஜல்லிக்கட்டு விளையாட்டில் அரசியலை புகுத்தக்கூடாது: முன்னாள் அமைச்சர் ஆர்.பி.உதயகுமார் வலியுறுத்தல்

 மதுரை, ஜல்லிக்கட்டு  விளையாட்டில் அரசியல் புகுத்தாமல் நடத்த வேண்டும் என்று சட்டமன்ற எதிர்க்கட்சி துணைத்தலைவர் ஆர்.பி.உதயகுமார் தெரிவித்துள்ளார். 

இது குறித்து செய்தியாளர்களிடம் அவர் கூறியதாவது:- தமிழர் திருநாளை தமிழர்களுக்கு ஏமாற்று திருநாளாக தி.மு.க. அரசு அமைத்துவிட்டது. இந்த தை திருநாளில் ஜல்லிக்கட்டு விழா அவனியாபுரம், பாலமேடு, அலங்காநல்லூர் பகுதிகளில் நடைபெற்று வருகிறது. இங்கு ஊர் கமிட்டி, ஊர் பொதுமக்களை, மண்ணின் மைந்தர்களை ஒதுக்கிவிட்டனர். அரசு விழா என்ற பெயரில் தி.மு.க. கட்சி ஜல்லிக்கட்டு விழாவாக அமைச்சர் மூர்த்தி நடத்தி வருகிறார். ஊர் கூடி தேர் இழுக்க வேண்டும். அப்போதுதான் அந்த சாமிக்கு பெருமை. ஆனால் இன்றைக்கு அரசு எந்திரத்தை தி.மு.க. கட்சி எந்திரமாக வைத்து நடத்தி, ஊர் கமிட்டியை ஊர் எல்லையில் நிறுத்தி விட்டார்கள். வாடிவாசலில் தி.மு.க. கட்சிகளை வைத்து விழாவை தொடங்கி உள்ளார்கள். இது ஜல்லிக்கட்டு விழாவிற்கு பெருமை சேர்ப்பதாக இல்லை. ஜல்லிக்கட்டு மதிப்பை சிதைப்பதாக உள்ளது.

ஜல்லிக்கட்டு விழாவில் முறையாக பதிவு செய்யப்பட்ட உள்ளூர் மாடுபிடி வீரர்கள், ஜல்லிக்கட்டு காளை உரிமையாளர்களுக்கு வாய்ப்பு வழங்கப்படாமல் பாரபட்சம் காட்டப்பட்டு வருகிறது. இது குறித்து அனைத்து தரப்பினரும் பேசி இருக்கிறார்கள். ஆன்லைன் பதிவில் கடும் குளறுபடி ஏற்பட்டுள்ளது. எனவே வருங்காலத்தில் இது போன்ற சம்பவங்கள் ஏற்பாடாமல் விளையாட்டில் அரசியல் புகுத்தாமல் நடத்த வேண்டும். இவ்வாறு அவர் கூறினார்.