தொடர்ந்து ஏறுமுகத்தில் தங்கம் விலை

சென்னை: சென்னையில் ஆபரணத் தங்கத்தின் விலை நேற்று சவரனுக்கு ரூ.240 உயர்ந்து விற்பனையானது.

தங்கம் விலையில் ஏற்ற, இறக்கம் தொடருகிறது. கடந்த மாதம் (டிசம்பர்) 26, 27-ம் தேதிகளில் விலை அதிகரித்து, பின்னர் விலை குறைந்த தங்கம், இந்த மாதம் தொடக்கத்தில் இருந்து மீண்டும் ஏறுமுகத்தில் காணப்பட்டது. கடந்த 3-ந்தேதி தங்கம் விலை சவரனுக்கு ரூ.640 அதிரடியாக உயர்ந்த நிலையில், மறுநாள் ரூ.360 குறைந்தது.

அதனை தொடர்ந்து தங்கம் விலை ஏற்ற, இறக்கத்துடன் காணப்பட்டு வருகிறது. 3 நாட்களுக்கு முன் தங்கம் விலை அதிரடியாக உயர்ந்து ஒரு சவரன் ரூ.60 ஆயிரத்தை கடந்து விற்பனை செய்யப்பட்டது. இந்த நிலையில் நேற்று தங்கம் விலை சற்று உயர்ந்து விற்பனையானது. அதன்படி சென்னையில் 22 கேரட் ஆபரணத் தங்கத்தின் விலை நேற்று சவரனுக்கு ரூ.240 உயர்ந்து ரூ. 60,440-க்கு விற்பனையானது. தங்கம் விலை கிராமுக்கு ரூ.30 உயர்ந்து ரூ.7,555-க்கு விற்பனையானது. வெள்ளி விலை கிராமுக்கு 1 ரூபாய் உயர்ந்து ரூ.105-க்கு விற்பனையானது.