அனைத்து வடிவிலான போட்டி: 2024-ம் ஆண்டின் ஐ.சி.சி. சிறந்த வீரர் விருதை வென்றார் பும்ரா

துபாய் : அனைத்து வடிவிலான போட்டிகளில் கடந்த ஆண்டுக்கான ஐசிசியின் சிறந்த வீரருக்கான விருதினை இந்திய அணியின் வேகப் பந்துவீச்சாளர் ஜஸ்பிரித் பும்ரா வென்றுள்ளார்.

துல்லியத்தன்மை...

இந்திய அணியின் நட்சத்திர வேகப் பந்துவீச்சாளரான ஜஸ்பிரித் பும்ரா கடந்த ஆண்டு அனைத்து வடிவிலான போட்டிகளிலும் சிறப்பாக செயல்பட்டுள்ளார். அவரது திறமை, பந்துவீச்சில் துல்லியத்தன்மை, தொடர்ச்சியாக சிறப்பாக செயல்படும் திறன் ஆகியவை அவருக்கு ஐசிசியின் சிறந்த வீரருக்கான விருதினை பெற்றுத் தந்துள்ளது. இது குறித்து ஐசிசி தரப்பில் தெரிவித்ததாவது: இந்திய அணியின் ஜஸ்பிரித் பும்ராவுக்கு கடந்த ஆண்டு முழுவதும் அனைத்து வடிவிலான போட்டிகளிலும் சிறப்பாக செயல்பட்டமைக்காக மிகவும் மதிப்புமிக்க சர் கர்ஃபீல்டு சோபர்ஸ் விருது வழங்கி கௌரவிக்கப்பட்டுள்ளது எனத் தெரிவிக்கப்பட்டுள்ளது.

5-வது இந்திய வீரர்...

31 வயதாகும் ஜஸ்பிரித் பும்ரா கடந்த ஆண்டுக்கான சிறந்த டெஸ்ட் வீரருக்கான விருதினையும் வென்றுள்ளார். அதேபோல, ஐசிசியின் கடந்த ஆண்டின் சிறந்த டெஸ்ட் அணியிலும் பும்ரா இடம்பிடித்துள்ளார். ஐசிசியின் சிறந்த வீரருக்கான சர் கர்ஃபீல்டு சோபர்ஸ் விருதினை வெல்லும் 5-வது இந்திய வீரர் என்ற பெருமையை ஜஸ்பிரித் பும்ரா பெற்றுள்ளார். அவருக்கு முன்பாக, ராகுல் டிராவிட் (2004), சச்சின் டெண்டுல்கர் (2010), ரவிச்சந்திரன் அஸ்வின் (2016) மற்றும் விராட் கோலி (2017, 2018) போன்ற இந்திய வீரர்கள் இந்த விருதினை வென்றுள்ளனர்.

900 புள்ளிகளை...

ஜஸ்பிரித் பும்ராவின் சிறப்பான செயல்பாடுகள் ஐசிசியின் டெஸ்ட் பந்துவீச்சு தவரிசை புள்ளிகளில் பிரதிபலித்தது. டெஸ்ட் போட்டிகளில் பந்துவீச்சு தரவரிசையில் பும்ரா 900 புள்ளிகளைக் கடந்து சாதனை படைத்தார். டெஸ்ட் போட்டிகளில் 900 புள்ளிகளைக் கடந்த முதல் இந்திய பந்துவீச்சாளர் என்ற பெருமையும் அவரையேச் சேரும்.