புதிய கல்விக் கொள்கை அமலுக்கு எதிர்ப்பு: புதுச்சேரி சட்டசபையில் இருந்து தி.மு.க., காங்கிரஸ் வெளிநடப்பு

புதுச்சேரி : புதுச்சேரியில் புதிய கல்விக் கொள்கை அமலுக்கு எதிர்ப்பு தெரிவித்து  சட்டப்பேரவையில் இருந்து  தி.மு.க. , காங்கிரஸ் எம்.எல்.ஏ. க்கள் வெளிநடப்பு செய்தனர்.  

புதுச்சேரி சட்டப்பேரவையில் நேற்று கேள்வி நேரத்தின்போது என்.ஆர்.காங்கிரஸ் எம்.எல்.ஏ.  சந்திர பிரியங்கா புதிய கல்விக் கொள்கை  குறித்து கேள்வி எழுப்பினார். அப்போது தி.மு.க.  எம்.எல்.ஏ.  நாஜிம் குறுக்கிட்டபோது, “உங்கள் பேரக்குழந்தையும், இங்குள்ள பலரின் குழந்தைகளும் சி.பி.எஸ்.இ.  பள்ளிகளில்தான் படிக்கிறார்கள்'' என்றார். அதற்கு “புதிய கல்விக் கொள்கை வேறு - சி.பி.எஸ்.இ.  கொள்கை வேறு” என்று தி.மு.க.  எம்.எல்.ஏ. க்கள் பதில் தந்தனர். இதனால் கூச்சல் குழப்பம் ஏற்பட்டது.  

அப்போது எதிர்க்கட்சித் தலைவர் சிவா, "புதியக் கல்விக் கொள்கை மத்திய அரசு சட்டமா? 2028-க்கு பிறகு இதை கட்டாயமாக்கி விடுவீர்கள். மக்கள் கருத்துக்கு எதிராக செயல்படுகிறீர்கள்" என்றார். அப்போது மீண்டும்  கூச்சல் குழப்பம் ஏற்பட்டது. மைக்குகளின் இணைப்பு நிறுத்தப்பட்டது. 

இந்நிலையில், பேரவைத் தலைவர் செல்வம், ''சி.பி.எஸ்.இ.  பாடத்தை புதுச்சேரியில் அமல்படுத்தியது யார் என்பது அனைவருக்கும் தெரியும்'' என்றார். எதிர்க்கட்சித் தலைவர் சிவா, ''புதிய கல்விக் கொள்கையை நீங்கள்தான் அமல்படுத்தியுள்ளீர்கள். மாணவர்களுக்கு எதிரான ஆர்.எஸ்.எஸ். கொள்கையை அமல்படுத்துவதை கண்டித்து வெளிநடப்பு செய்கிறோம்'' என்றார். அதையடுத்து தி.மு.க. , காங்கிரஸ் கட்சியினர் வெளிநடப்பு செய்தனர்.