தமிழக கவர்னர் இன்று சென்னை திரும்புகிறார்

சென்னை : கவர்னர் ஆர்.என்.ரவி இன்று சென்னை திரும்புகிறார்.

தமிழக கவர்னர் ஆர்.என்.ரவி நேற்று முன்தினம் காலை 6.50 மணிக்கு டெல்லி சென்றார். டெல்லியில் நடைபெற்ற திருமண வரவேற்பு நிகழ்ச்சியில் அவர் கலந்து கொண்டார். நேற்று டெல்லியில் தங்கி இருந்த அவர் மத்திய அமைச்சர்களை சந்தித்து பேசியதாக தகவல்கள் வெளியாகி இருந்தன.

தமிழகத்தில் தொகுதி மறுசீரமைப்பு குறித்து முதல்வர் மு.க.ஸ்டாலின் வருகிற 22-ம் தேதி தென்மாநில கூட்டு நடவடிக்கை குழு கூட்டம் நடத்த இருக்கிறார். இதில் பல்வேறு மாநிலங்களில் இருந்து கட்சி தலைவர்கள், எம்.பி.க்கள் கலந்து கொள்ள உள்ளனர்.

இந்த சூழ்நிலையில் கவர்னர் ஆர்.என்.ரவி டெல்லி சென்றிருப்பது முக்கியத்துவம் வாய்ந்ததாக கருதப்படுகிறது. அவர் டெல்லியில் யாரையெல்லாம் சந்தித்து பேசினார் என்ற தகவல் ரகசியமாக வைக்கப்பட்டு உள்ளது. நேற்று முழுவதும் டெல்லியில் இருந்த கவர்னர் ஆர்.என்.ரவி இன்று மாலை சென்னை திரும்புகிறார்.