சென்னை - பெங்களூரு போட்டி: இன்று நள்ளிரவு 1 மணி வரை மெட்ரோ ரெயில்கள் இயக்கம்

சென்னை: சென்னை - பெங்களூரு கிரிக்கெட் போட்டியை முன்னிட்டு இன்று நள்ளிரவு 1 மணி வரை மெட்ரோ ரெயில்கள் இயங்கும் என்று அறிவிக்கப்பட்டுள்ளது.

18-வது ஐ.பி.எல். கிரிக்கெட் தொடர் கடந்த 22ம் தேதி தொடங்கி நடைபெற்று வருகிறது . இதில் இன்று சென்னை சேப்பாக்கம் மைதானத்தில் நடைபெற உள்ள லீக் ஆட்டத்தில் சென்னை சூப்பர் கிங்ஸ் - ராயல் சேலஞ்சர்ஸ் பெங்களூரு அணிகள் மோத உள்ளன. இந்த போட்டியையொட்டி இன்று நள்ளிரவு 1 மணி வரை மெட்ரோ ரெயில்கள் இயக்கப்படும் என தெரிவிக்கப்பட்டுள்ளது. 

போட்டி முடிந்து ரசிகர்கள் பாதுகாப்பாக திரும்புவதற்காக, நள்ளிரவு 1 மணி வரை மெட்ரோ ரெயில் சேவைகள் நீட்டிக்கப்பட்டுள்ளன. சென்னை சேப்பாக்கம் மைதானத்தில் நடைபெறும் போட்டிகளை காண வரும் ரசிகர்கள், போட்டியின் டிக்கெட்டை காண்பித்து மெட்ரோ ரெயில்களில் இலவசமாக பயணிக்கலாம் என்பது குறிப்பிடத்தக்கது.