எல்லை வான் பாதுகாப்பை மேலும் வலுப்படுத்த ரஷ்யாவுடன் இந்தியா பேச்சுவார்த்தை

புதுடில்லி : சீனா மற்றும் பாகிஸ்தான் எல்லைப்பகுதிகளில் வான் பாதுகாப்பை வலுப்படுத்த, ரஷ்யாவிடம் இருந்து கூடுதல் எஸ்-400 ஏவுகணை தடுப்பு அமைப்புகளை வாங்குவதற்கான பேச்சுவார்த்தையை இந்தியா தொடங்கி உள்ளது.

ரஷ்யா வடிவமைத்துள்ள எஸ்-400 அதிநவீன வான் பாதுகாப்பு கவச வாகனம், இந்தியாவில் சுதர்சன சக்கரம் என்று அழைக்கப்படுகிறது. இந்த வாகனம் 600 கி.மீ., தொலைவில் இருந்து வரும் ஏவுகணைகளையும் கண்காணிக்கும். அதேபோல் 400 கி.மீ., தொலைவில் உள்ள இலக்குகளை இடைமறித்து அழிக்கவும் முடியும். சிந்தூர் நடவடிக்கையின் போது எஸ்-400 வான் பாதுகாப்பு ஏவுகணை அமைப்பை வெற்றிகரமாகப் பயன்படுத்தியதைத் தொடர்ந்து, தளத்தின் கூடுதல் பிரிவுகளுக்கான கோரிக்கையுடன் இந்தியா, ரஷ்யாவை முறையாக அணுகியுள்ளதாக உயர் பாதுகாப்பு வட்டாரங்கள் தெரிவித்துள்ளன. மேற்கு எல்லையைத் தாண்டி வான்வழி அச்சுறுத்தல்களை எதிர்கொள்வதில் இந்த அமைப்புகள் அதிக துல்லியம் மற்றும் செயல்திறனைக் காட்டின.

இந்த செயல்திறனால் மிகுந்த பயனை பெற்ற இந்தியா, ரஷ்யாவிடமிருந்து மேலும் விநியோகங்களை நாடுவதன் மூலம் அதன் வான் பாதுகாப்பு திறன்களை விரிவுபடுத்த விரும்புகிறது. ரஷ்யா விரைவில் இந்த கோரிக்கையை அங்கீகரிக்க வாய்ப்புள்ளது.இது நிறைவேற்றப்பட்டால், இந்தியாவின் வான் பாதுகாப்பு திறன் மேலும் வலுப்படுத்தப்படும். இவ்வாறு உயர் பாதுகாப்பு வட்டாரங்கள் தெரிவித்துள்ளன.