தென்மேற்கு பருவமழை தீவிரம்: கேரளா, மும்பை, கர்நாடகாவில் கனமழை

மும்பை, தென்மேற்கு பருவமழை நேற்று முன்தினம் (மே 25, 2025) தொடங்கியதால் மகாராஷ்டிரா, கோவா, கர்நாடகா, கேரள மாநிலங்களில் கனமழை பொழிந்து வருகிறது.  கனமழை காரணமாக மக்களின் இயல்பு வாழ்க்கை பாதிக்கப்பட்டது.

கேரளாவின் கோழிக்கோடு மற்றும் வயநாடு மாவட்டங்களின் பல பகுதிகள் மிக கனமழையால் பெரிய அளவில் பாதிக்கப்பட்டுள்ளதால், அம்மாவட்டங்களுக்கு நேற்றும், இன்றும்  ரெட் அலர்ட் விடுக்கப்பட்டிருந்தது. கனமழை காரணமாக பத்தனம்திட்டா, கோட்டயம், இடுக்கி, எர்ணாகுளம், திருச்சூர், மலப்புரம், கோழிக்கோடு, வயநாடு, கண்ணூர் மற்றும் காசர்கோடு மாவட்டங்களில் உள்ள பள்ளிகள், கல்லூரிகள் மற்றும் கல்வி நிறுவனங்களுக்கு நேற்று விடுமுறை அறிவிக்கப்பட்டிருந்தது. கண்ணூர் பல்கலைக்கழகமும் திங்கட்கிழமை திட்டமிடப்பட்ட அனைத்து தேர்வுகளையும் ஒத்திவைத்துள்ளது.

தொடர் கனமழை காரணமாக நேற்று மும்பை புறநகர் ரயில்கள் சுமார் 8-10 நிமிடங்கள் தாமதமாக வந்தன. மே 25 அன்று புனேவில் உள்ள பாராமதி மற்றும் இந்தாபூர் தாலுகாக்களில் கனமழை பெய்ததால், பல பகுதிகளில் வெள்ளப்பெருக்கு ஏற்பட்டது, இதனால் மாவட்ட ஆட்சியரின் அவசர வேண்டுகோளின் பேரில் தேசிய பேரிடர் மீட்புப் படை  சிறப்பு குழுக்களை அனுப்பியது.  இந்தாப்பூருக்கு அருகிலுள்ள புனே-சோலாப்பூர் நெடுஞ்சாலையின் ஒரு பகுதியில் தண்ணீர் தேங்கியதால் சுமார் இரண்டு மணி நேரம் போக்குவரத்து மூடப்பட்டது.

மே 25 முதல் 29 வரை பெங்களூருவில் பலத்த மழை மற்றும் இடியுடன் கூடிய மழை பெய்யும் என்று வானிலை ஆய்வு மையம் கணித்துள்ளது.  கர்நாடகாவின் மங்களூரு, நுஜிபால்தில் மற்றும் கடபா உள்ளிட்ட பல பகுதிகளில் கனமழை காரணமாக கணிசமான பாதிப்பு ஏற்பட்டுள்ளது. மங்களூரு மற்றும் உல்லாலில், கடுமையான மழையால் பரவலான வெள்ளப்பெருக்கு ஏற்பட்டு, இயல்பு வாழ்க்கை கடுமையாக பாதிக்கப்பட்டுள்ளது