டெல்டா மாவட்ட பாசனத்திற்காக மேட்டூர் அணையை இன்று திறந்து வைக்கிறார் முதல்வர்

சேலம் : டெல்டா மாவட்டங்களின் பாசனத்திற்காக மேட்டூர் அணையை இன்று முதல்வர் மு.க.ஸ்டாலின் திறந்து வைக்கிறார். இதனால் சுமார் 16 லட்சம் ஏக்கர் நிலங்கள் பாசன வசதி பெறும்.

வழக்கமாக டெல்டா மாவட்டங்களின் குறுவை, சம்பா மற்றும் தாளடி சாகுபடிக்காக ஜூன் 12-ம் தேதி தண்ணீர் திறக்கப்பட்டு ஜனவரி 28ஆம் தேதி வரை செல்லும். சுமார் 230 நாட்களுக்கு பாசனத் தேவைக்கு 330 டிஎம்சி தண்ணீர் தேவைப்படுகிறது. அணையில் 90 அடிக்கு மேல் தண்ணீர் இருந்தால் ஜூன் 12-ம் தேதி மேட்டூரில் இருந்து தண்ணீர் திறக்கப்படம்.

மொத்தம் 120 அடி உயரமுள்ள மேட்டூர் அணையில் 94 டிஎம்சி வரை தண்ணீர் தேக்கி வைக்க முடியும். தற்போது அதில் 85.15 டிஎம்சி வரை தண்ணீர் இருப்பு உள்ளது. அணையின் நீர்மட்டமும்114.62 அடியாக அதிகரித்துள்ளது. மேட்டூர் அணைக்கு வரும் நீர் அளவு வினாடிக்கு 5146 கன அடியாக இருக்கிறது. குடிநீர் தேவைக்கு 1000 கன அடி திறக்கப்பட்டு வருகிறது.

போதிய அளவு தண்ணீர் இருப்பதால் முதல்வர் மு.க.ஸ்டாலின் இன்று காலை மேட்டூர் அணையின் ஷட்டரை இயக்கி தண்ணீரை திறந்துவிட உள்ளார். இது அடுத்த சில நாட்களில் மாயனூர் கதவணை, மேலணையை அடைந்து வரும் 15-ம் தேதி கல்லணையை அடைய உள்ளது. அங்கும் 15-ம் தேதியே தண்ணீர் திறக்கப்படுகிறது. இதனால் மகிழ்ச்சி அடைந்துள்ள டெல்டா விவசாயிகள் குறுவை சாகுபடிக்கான முன்னேற்பாடு பணிகளை முடுக்கிவிட்டுள்ளனர்.

குறித்த நேரத்தில் இன்று மேட்டூர் அணை இன்று திறக்கப்படவுள்ளதால் விவசாயிகள் மகிழ்ச்சி அடைந்துள்ளனர். மேட்டூர் அணை நீர்திறப்பு மூலம் டெல்டா மாவட்டங்களில் சுமார் 16 லட்சம் ஏக்கர் நிலங்கள் பாசன வசதி பெறும்.