தங்கம் விலை சற்று உயர்வு

சென்னை, தங்கம் விலை நேற்று சற்று உயர்ந்து விற்பனையானது. 

தங்கம் விலை கடந்த மாதம் (ஜூலை) 23-ந் தேதி ஒரு சவரன் ரூ.75,040-க்கு விற்பனை ஆனது. இதுவரை இல்லாத வகையில் தங்கம் விலை புதிய உச்சத்தை அன்றைய தினம் தொட்டு இருந்தது. அதன் பின்னரும் விலை அதிகரிக்கும் என்று சொல்லப்பட்ட நிலையில், விலை குறையத் தொடங்கியது. எந்த அளவுக்கு உயர்ந்ததோ, அதேபோல் விலை சரியவும் தொடங்கியது.

இடையில் சற்று விலை கூடினாலும், மற்ற நாட்களில் குறைந்த வண்ணமே இருந்தது. இதன் தொடர்ச்சியாக கடந்த 3 நாட்களுக்கு முன் தங்கம் விலை அதிரடியாக உயர்ந்து ஒரு சவரன் ரூ.74 ஆயிரத்தை மீண்டும் தாண்டியது. நேற்று முன்தினம் ஒரு கிராம் தங்கம் ரூ.9,290-க்கும், ஒரு சவரன் ரூ.74,320-க்கும் விற்பனையானது.

இந்த நிலையில் தங்கம் விலை நேற்று சற்று உயர்ந்து விற்பனையானது. கிராமுக்கு 5 ரூபாய் உயர்ந்து ஒரு கிராம் தங்கம் ரூ.9,295-க்கும், சவரனுக்கு 40 ரூபாய் உயர்ந்து ஒரு சவரன் ரூ.74,360-க்கும் விற்பனையானது. வெள்ளி விலையில் நேற்று மாற்றம் இல்லை. ஒரு கிராம் வெள்ளி 123 ரூபாய்க்கும், பார் வெள்ளி 1 லட்சத்து 23 ஆயிரம் ரூபாய்க்கும் விற்பனையானது.