குடியரசு துணைத் தலைவர் தேர்தல்: தி.மு.க.வுக்கு இ.பி.எஸ் வேண்டுகோள்

சென்னை : தேசிய ஜனநாயகக் கூட்டணியின் குடியரசு துணைத் தலைவர் வேட்பாளராக சி.பி.ராதாகிருஷ்ணன் தேர்வு செய்யப்பட்டுள்ள நிலையில், தி.மு.க. எம்.பிக்கள் கட்சி பேதமின்றி அவருக்கு ஆதரவு தர வேண்டும் என எடப்பாடி பழனிசாமி வேண்டுகோள் விடுத்துள்ளார்.

’மக்களை காப்போம் தமிழகத்தை மீட்போம்’ என்ற பெயரில் சட்டமன்ற எதிர்க்கட்சித் தலைவரும், அ.தி.மு.க. பொதுச் செயலாளருமான எடப்பாடி பழனிசாமி தமிழகம் முழுவதும் சுற்றுப் பயணம் மேற்கொண்டு வருகிறார். இதுவரை திருப்பத்தூர், வேலூர், ராணிப்பேட்டை மாவட்டங்களில் சுற்றுப் பயணம் மேற்கொண்ட அவர் நேற்று திருவண்ணாமலை மாவட்டத்திற்கு சென்றார். அதனை தொடர்ந்து நேற்று அவர் அண்ணாமலையார் கோயிலில் சாமி தரிசனம் செய்தார்.

இதையடுத்து அவர் செய்தியாளர்களை சந்தித்தார். அப்போது அவரிடம் குடியரசு துணைத் தலைவர் வேட்பாளராக தேசிய ஜனநாயகக் கூட்டணி சார்பில் சி.பி.ராதாகிருஷ்ணன் தேர்வு செய்யப்பட்டுள்ளது குறித்து கேள்வி எழுப்பப்பட்டது. அதற்து அவர், "இது ஒரு நற்செய்தி. தமிழ்நாட்டை சேர்ந்த ஒருவர் குடியரசு துணைத் தலைவரானால் அது தமிழ்நாடுக்கு பெருமை. சி.பி.ராதாகிருஷ்ணனுக்கு எனது வாழ்த்துகள். கட்சி பேதமின்றி தி.மு.க. எம்.பிக்கள் தமிழகத்தை சேர்ந்த ஒருவர் குடியரசு துணைத் தலைவராவதற்து தங்களது ஆதரவை தெரிவிக்க வேண்டும் என அன்போடு கேட்டுக் கொள்கிறேன்" என்றார்.