பாகிஸ்தான் கேப்டன், மேனேஜரிடம் மன்னிப்பு கேட்டார் ஐ.சி.சி. நடுவர் ஆண்டி பைக்ராஃப்ட்

அபுதாபி: ஆசியக் கோப்பையின் சர்ச்சை நாயகனான ஜிம்பாப்வே முன்னாள் வீரரும் ஆசியக் கோப்பை ஐ.சி.சி. ஆட்ட நடுவருமான ஆண்டி பைகிராப்ட் பாகிஸ்தான் கேப்டன் சல்மான் ஆகா மற்றும் மேனேஜரிடம் மன்னிப்புக் கேட்டதாக பாகிஸ்தான் கிரிக்கெட் வாரியம் தான் வெளியிட்டுள்ள அறிக்கையில் தெரிவித்துள்ளது.

ஆட்ட நடுவராக... 

சர்ச்சைகளை கிளப்பிய கைகுலுக்கல் விவகார இந்தியா - பாகிஸ்தான் மேட்சில் ஆட்ட நடுவராக இருந்தவர் ஆண்டி பைகிராஃப்ட். யு.ஏ.இ. அணிக்கு எதிரான போட்டியில் பாகிஸ்தான் களமிறங்குவதில் தாமதம் ஏற்பட்டது, ஆட்ட நடுவர் ஆண்டி பைகிராப்ட்டை நீக்க வேண்டும் என்று பாகிஸ்தான் வாரியம் எதிர்ப்பு தெரிவித்திருந்தது, அதற்கு ஐ.சி.சி. மறுப்பு தெரிவித்திருந்தது, இந்நிலையில் மைதானத்திற்கு வருவதற்கு பாகிஸ்தான் வீரர்கள் தாமதம் செய்தனர்.

மன்னிப்புக் கேட்டார்...

ஆட்டம் ஒரு மணி நேரம் தாமதமானது இந்தச் சர்ச்சையினால்தான். இந்நிலையில் ஆண்டி பைகிராஃப்ட், பாகிஸ்தான் கேப்டன், பாகிஸ்தான் மேலாளர் ஆகியோர் தனியறையில் சந்தித்ததாகத் தெரிகிறது, அதன் பிறகே பாகிஸ்தான் வெளியிட்டுள்ள அறிக்கையில், “பாகிஸ்தான் கிரிக்கெட் அணியின் கேப்டன் மற்றும் மேலாளரிடம் ஆட்ட நடுவர் ஆண்டி பைக்ராஃப்ட் மன்னிப்புக் கேட்டார். இந்தியா-பாகிஸ்தான் போட்டியின் போது இரு அணி வீரர்கள் கைகுலுக்குவதை இவர்தான் தடுத்தார்” என்று அந்த அறிக்கையில் கூறப்பட்டுள்ளது.