இன்று 77-வது குடியரசு தினம்: தலைநகர் டெல்லியில் உச்சகட்ட பாதுகாப்பு

புதுடெல்லி, நாடு முழுவதும் குடியரசு தினம் இன்று கொண்டாடப்படவுள்ள நிலையில், தலைநகர் டெல்லியில் உள்ள இந்தியா கேட் மற்றும் குடியரசுத் தலைவர் மாளிகை உள்பட நாடு முழுவதும் உச்சகட்ட பாதுகாப்பு வளையத்தில் கொண்டு வரப்பட்டுள்ளது. தலைநகர் டெல்லியில் 70 ஆயிரத்திற்கும் அதிகமான காவலர்கள் குவிக்கப்பட்டு தீவிர கண்காணிப்பு மேற்கொள்ளப்பட்டு வருகிறது.

இந்தியாவின் 77வது குடியரசு தினம் இன்று கொண்டாடப்படவுள்ள நிலையில் நாட்டின் பல்வேறு பகுதிகளில் உள்ள வரலாற்று சின்னங்கள், விமான நிலையங்கள், கட்டடங்கள் வண்ண விளக்குகளால் ஒளிர்கின்றன. ஜம்மு காஷ்மீரின் ரியாசி மாவட்டத்தில் உள்ள சலால் அணை மூவர்ண விளக்குகளால் ஜொலித்தது. 

அதேபோல், மும்பையில் பல்வேறு அரசு கட்டிடங்கள் மூவர்ண விளக்குகளில் அலங்கரிக்கப்பட்டிருந்தது. குடியரசு தினத்தையொட்டி டெல்லி முழுவதும் 70 ஆயிரத்திற்கும் அதிகமான காவலர்கள் பாதுகாப்பு பணியில் ஈடுபடுத்தப்பட்டுள்ளனர். டெல்லி நகர் முழுவதும் பொருத்தப்பட்டுள்ள ஆயிரத்திற்கும் அதிகமான கண்காணிப்பு கேமராக்கள் மூலம் கடமைப் பாதை அருகேயுள்ள கட்டுப்பாட்டு அறையில் இருந்து காவலர்கள் கண்காணித்து வருகின்றனர். மேலும் நாடு முழுவதும் பாதுகாப்பு வளையத்திற்குள் கொண்டு வரப்பட்ட தீவிரமாக கண்காணிக்கப்பட்டு வருகிறது.

குடியரசு தின விழாவில் சிறப்பு விருந்தினராக கலந்து கொள்ள இந்தியா வந்த ஐரோப்பிய ஆணையத்தின் தலைவர் உர்சுலா வான் டெர் லேயனை, மத்திய இணையமைச்சர் ஜித்தின் பிரசதா வரவேற்றார். அதேபோல், சென்னை விமான நிலையத்தில் 7 அடுக்கு பாதுகாப்பு போடப்பட்டு உள்ளது. விமான நிலைய கார் பார்க்கிங் பகுதி, பயணிகள் வெளியேறும் நுழைவு வாயில் உள்ளே செல்லும் நுழைவு வாயில் என அனைத்து இடங்களிலும் காவலர்கள் தீவிர கண்காணிப்பில் ஈடுபட்டு வருகின்றனர்.

கோவை ரயில் நிலையத்திலும் காவல்துறையினர், ரயில்வே காவலர்கள் இணைந்து தீவிர கண்காணிப்பில் ஈடுபட்டனர். தென்காசி, திண்டுக்கல், விருத்தாசலம் ரயில் நிலையங்களிலும் ரயில்வே காவலர்களுடன் காவல்துறையினர் இணைந்து தீவிர சோதனையில் ஈடுபட்டனர். பயணிகளின் உடைமைகளை பரிசோதித்தனர்.