ஊழல் விஷயத்தில் பா.ஜ. மென்மை: சோனியா

போபால்,நவ.22 -பாரதிய ஜனதா கட்சியானது ஊழல் விஷயத்தில் மென்மையுடன் நடந்து கொள்கிறது. அந்த கட்சியை சேர்ந்த ஊழல்வாதிகளை கண்டிப்பதில்லை என்று சோனியா காந்தி கடுமையாக குற்றஞ்சாட்டி உள்ளார். 

மத்தியப்பிரதேச மாநிலத்தில் காங்கிரஸ் வேட்பாளர்களை ஆதரித்து ஜபுவா மாவட்டத்தில் சோனியா காந்தி நேற்று தீவிரமாக பிரசாரம் செய்தார். அப்போது அவர் பாரதிய ஜனதாவை கடுமையாக தாக்கி பேசினார். காங்கிரஸ் கட்சியானது ஊழலை தடுக்க கடும் நடவடிக்கை எடுத்து வருகிறது. கட்சிக்காரர்களாக இருந்தாலும் அவர்கள் மீது எந்தவித பாரபட்சமும் இல்லாமல் நாங்கள் நடவடிக்கை எடுத்து வருகிறோம். ஆனால் பாரதிய ஜனதாவோ ஊழலை ஒழிக்க நடவடிக்கை எடுப்பதில்லை. அதுவும் கட்சிக்காரர்கள் ஊழலில் ஈடுபட்டால் அதுபற்றி கவலைப்படுவதே இல்லை என்றார். மாநிலங்களுக்கு போதுமான நிதியை மத்திய அரசு ஒதுக்கி வருகிறது. ஆனால் அந்த நிதியை குறிப்பாக பாரதிய ஜனதா கட்சி ஆளும் மாநிலங்களில் சரியாக பயன்படுத்துவதில்லை. அதனால் அந்த மாநிலங்களில் வளர்ச்சி குன்றி இருக்கிறது என்றும் சோனியா காந்தி குற்றஞ்சாட்டினார். மாநிலங்களில் வளர்ச்சி திட்டங்களை செயல்படுத்தத்தான் மத்திய அரசு நிதி ஒதுக்கீடு செய்கிறது. ஆனால் பாக்கெட்டுகளை நிரப்புவதற்காக மத்திய அரசு நிதி ஒதுக்கீடு செய்யவில்லை என்றும் சோனியா சாடினார்.