கோவில்பட்டி நேஷனல் பொறியியல் கல்லூரியில் இந்திய கணிப்பொறி மாணவர் பிரிவு துவக்கவிழா

ஞாயிற்றுக் கிழமை, 26 பெப்ரவரி 2017      தூத்துக்குடி
kvp nec18

கோவில்பட்டி.பிப்.18-

 


கே.ஆர்.நகர், நேஷனல் பொறியியல் கல்லூரியின் இந்திய கணிப்பொறி மன்றம் - மாணவர் பிரிவு சார்பில் தேசிய அளவிலான இரண்டு நாள் தொழில்நுட்பக் கருத்தரங்கு  கல்லூரி வளாகத்தில் வைத்து வெற்றிகரமாக நடைபெற்றது. இவ்விழாவிற்கு கல்லூரியின் இயக்குனர் முனைவர் கே.என்.கே.எஸ்.கே.சொக்கலிங்கம், முதல்வர் முனைவர் எஸ்.சண்முகவேல் மற்றும் கல்லூரியின் சி.எஸ்.ஐ தலைவர் முனைவர் டி.மணிமேகலை முன்னிலை வகித்தனர். சி.எஸ்.ஐ மாணவர் பிரிவு மாநில மாணவர் ஒருங்கிணைப்பாளர் முனைவர் வி.பாலமுருகன்;, மனோன்மணியம் சுந்தரனார் பல்கலைக்கழகம், திருநெல்வேலி தலைமை விருந்தினராக கலந்து கொண்டு விழாவினை துவக்கி வைத்தார். கல்லூரியின் சி.எஸ்.ஐ மாணவர் பிரிவு தலைவர் பி.முரளி வினோத் வரவேற்புரை வழங்கினார்.எல்.ஜெராட் ஜுலஸ், சி.எஸ்.ஐ ஒருங்கிணைப்பாளர் முன்னுரை வழங்கினார். அடுத்ததாக சி.எஸ்.ஐ ஆசிரியர் ஒருங்கிணைப்பாளர் கே.ராஜ்குமார் தலைமை விருந்தினரை அறிமுகப்படுத்தினார். கல்லூரியின் முதல்வர் தமது உரையில் மாணவர்களை அனைத்து கல்லூரி நிகழ்வுகளிலும் பங்கெடுக்குமாறும், தொழில்நுட்ப அடிப்படை அறிவினை மாணவர்கள் பெற்றுக்கொள்ள வேண்டும் எனவும் அறிவுறுத்தினார். தலைமை விருந்தினர் தமது உரையில் டிஜிட்டல் இந்தியா, மேக் இன் இந்தியா மற்றும் வாஷிங்டன் அக்கார்ட் ஆகிய செயல்திட்டங்களைப் பற்றி விரிவாக கூறினார். மேலும் மாணவர்களை இக்கருத்தரங்கின் மூலம் அமைப்புத்திறன் மற்றும் தலைமை பண்பு ஆகியவற்றை வளர்த்துக்கொள்ளுமாறும் அறிவுறுத்தினார். இவ்விழாவில் அதிக ஈடுபாடு கொண்ட மாணவருக்கான கிளை விருது, செல்வி ஜெ.பெனீட்டா கிரேஸ்-க்கு வழங்கப்பட்டது. இக்கருத்தரங்கில் பில்ட் டூ டெஸ்ட்ராய், மினிட் டூ வின் இட், பாலிக்லாட், கேமிங் போன்ற நிகழ்வுகளும் இன்டர்நெட் ஆப் திங்க்ஸ் கருத்தரங்கும் நடைபெற்றது. இக்கருத்தரங்கில் 100-க்கும் மேற்பட்ட மாணவர்கள் பல்வேறு நிகழ்வுகளில் கலந்து கொண்டனர். இறுதியாக வெற்றி பெற்ற மாணவர்களுக்கு பரிசுத் தொகை வழங்கப்பட்டது.இவ்விழாவிற்கான ஏற்பாடுகளை கல்லூரியின் சி.எஸ்.ஐ தலைவர் முனைவர் டி.மணிமேகலை தலைமையில் ஒருங்கிணைப்பாளர்கள் எல்.ஜெராட் ஜுலஸ், கே.ராஜ்குமார் மற்றும் கழக உறுப்பினர்கள் சிறப்பாக செய்திருந்தனர்.

 

சில சுவாரிஸ்யமான தகவல்கள்

நினைப்பதை டைப் செய்யும்

தீவிர பக்கவாத நோயினால் பாதிக்கப்பட்டவர்கள் தகவல் பரிமாற்றங்களை செய்ய முடியாமல் தவிப்பார்கள். இப்படிப்பட்டவர்களுக்கு உதவுவதற்காக அமெரிக்காவில் உள்ள ஸ்டேன்ட் போர்டு பல்கலைக்கழக விஞ்ஞானிகள் மூளையில் நினைப்பதை டைப் செய்யும் வகையில் கம்ப்யூட்டரை உருவாக்கி உள்ளனர். இதற்காக மின்சார தாக்குதலால் கை- கால் செயலிழந்த மற்றும் வாய் பேச முடியாத ஒருவரை வைத்து ஆராய்ந்ததில் அவர் மனதில் ஏற்படும் உணர்வை கம்ப்யூட்டர் கிரகித்து அதை டைப் செய்கிறது. இந்த கருவியை தலையின் மேல் பகுதியில் பொருத்திக்கொண்டால் போதும். அது, மூளையில் நடக்கும் அதிர்வுகளை துல்லியமாக கணித்து அவர் பேச வேண்டியதை டைப் செய்து தருகிறது. இது பக்கவாத நோயாளிகளுக்கு மிகவும் உதவியாக இருக்கும் என்று விஞ்ஞானிகள் தெரிவித்தனர்.

மூட்டுகள் பலப்பட

எலும்பு மூட்டுகள் ஆரோக்கியமாக இருக்க வேண்டுமானால், முதலில் சரியான உடல் எடையைப் பராமரிக்க வேண்டும். அழற்சி எதிர்ப்பு உணவுகளான ஆலிவ் ஆயில், முழு தானியங்கள் போன்றவற்றை அன்றாட உணவுகளில் சேர்த்துக் கொள்ள வேண்டும். மேலும், வைட்டமின் மற்றும் கனிமச்சத்து மாத்திரைகளை வாங்கி சாப்பிட வேண்டும்.

நிறம் மாறும்

சுற்றுச்சூழலுக்கு ஏற்ப நிறம் மாறும் ஹேர் டை ஒன்று தற்போது கண்டுபிடிக்கப்பட்டுள்ளது. பயர் (fire) என பெயர் சூட்டப்பட்டுள்ள இந்த ஹேர் டை தட்பவெப்பநிலை மற்றும் சுற்றுச்சூழலுக்கு ஏற்ப நிறம் மாறும் தன்மை கொண்டது. அடர்சிவப்பு தொடங்கி பல்வேறு நுண்ணிய நிறங்களில் இந்த ஹேர் டை கிடைக்கிறது.

இந்தியாவுக்கு முதலிடம்

உலகம் முழுவதும் 32 கோடிக்கும் அதிகமான மக்கள், மன அழுத்தத்தால் பாதிக்கப்பட்டுள்ளனர். இந்தியாவில்தான் அதிகளவு தற்கொலைகள் நடைபெறுவதாகவும் கடந்த 2005ம் ஆண்டு தொடங்கி, 2015ம் ஆண்டு வரையான காலத்தில், இந்திய அளவில் 5.66 கோடி தற்கொலைகள் நிகழ்ந்துள்ளதாக தெரிய வந்துள்ளது. இவர்களில், 3 கோடி பேர் மன அழுத்தம்.

64 ஆண்டுகளுக்கு பின்...

உலகில் வாழும் அரிய வகை பாம்புகளில் ஒன்று தொண்டை சுருக்கு பாம்பு. இந்த அரிய வகை பாம்புகள் பிரேசில் காடுகளில் யார் கண்களுக்கு படாமல் உயிர்வாழ்ந்து வந்தது. இந்நிலையில், அரிய வகை தொண்டை சுருக்கு பாம்பு ஒன்று 64 ஆண்டுகளுக்கு பிறகு வெளியே வந்துள்ளதாக ஆராய்ச்சியாளர்கள் தெரிவித்துள்ளனர். இந்த பாம்பு ஒரு பெண் இனம். பாம்பின் நீளம் 1.7 மீட்டர். எடை 1.5 கிலோகிராம்.

சாகோன் நாகரீகம்

1000 ஆண்டுகளுக்கு முன் வாழ்ந்த சாகோன்கள் இன்றைய நியூ மெக்சிகோ பகுதிகளில் வாழ்ந்து வந்துள்ளனர். இந்த சாகோன்கள் 100க்கும் அதிகமான அறைகள் கொண்ட லாவிஷ் கற்களால் ஆன வீடுகளில் வசித்து வந்துள்ளனர். மேலும், இங்கு பெண்களே ஆட்சி செய்ததாகவும், அவர்கள் தங்களது சக்திகளை தங்களின் மகள்களுக்கு வழங்கியதாகவும் கூறப்படுகிறது.

கூடும் ஆயுட்காலம்

பெண்களின் சராசரி ஆயுட்காலம் தொடர்பாக 35க்கும் மேற்பட்ட வளர்ந்த நாடுகளில் நடத்தப்பட்ட ஆய்வின் முடிவின்படி, நவீன மருத்துவ உலகில் சராசரி ஆயுட்காலம் அதிகரித்து வருவதாக தெரிய வந்துள்ளது. 2030-களில் தென்கொரியா, பிரான்ஸ், ஜப்பான், ஸ்பெயின் நாட்டு பெண்களின் சராசரி ஆயுட்காலம் 88 வயதை எட்டக்கூடுமாம்.

7 புதிய கோள்கள் கண்டுபிடிப்பு

வரலாற்றில் முதன் முறையாக பூமி அளவில் இருக்கும் ஏழு கோள்களை விண்வெளி ஆராய்ச்சியாளர்கள் கண்டுபிடித்துள்ளனர். பூமியில் இருந்து 39 ஒளியாண்டு தொலைவில் இருக்கும் இந்த கோள்களில் மனிதர்கள் வாழ சாத்தியம் என்றே தற்போது வரை கிடைத்திருக்கும் தகவல்களில் தெரியவந்துள்ளது.  இவற்றில் நீர் மற்றும் வாழக்கூடிய தன்மைகள் இருக்க அதிக வாய்ப்புகள் இருக்கிறது என மூத்த ஆராய்ச்சியாளர் மைக்கேல் கில்லான் தெரிவித்துள்ளார்.  ஏற்கனவே வாணியல் ஆரய்ச்சியாளர்கள் ஏழு கோள்களை கண்டுபிடித்துள்ளனர். எனினும் அவை அனைத்தும் பூமி அளவில் இருக்கவில்லை இதனால் பூமி அளவு கொண்ட 7 கோள்கள் கண்டுபிடிக்கப்பட்டுள்ளது இதுவே முதல் முறை. அனைத்து கோள்களும் ஒரே சுற்றுப் பாதையில் பயணிப்பதால் இவற்றின் ஒரு பகுதியில் நீர் இருப்பதற்கான சாத்தியம் அதிகம் என கூறப்படுகிறது.

தமிழில் ஸ்கைப்

குறைந்த அளவு இணைய வேகத்திலும் சிறப்பாக இயங்கும் வகையிலான ஸ்கைப் லைட் செயலியை இந்திய பயனாளர்களுக்காக மைக்ரோசாஃப்ட் நிறுவனம் பிரத்யேகமாக வடிவமைத்து அறிமுகப்படுத்தியுள்ளது. ஆண்ட்ராய்டு இயங்குதளங்களில் இயங்கும் இந்த செயலி, குறைவான இணைய வேகம் கொண்ட மொபைல் போன்களிலும் இயங்கும் வகையில் வடிவமைக்கப்பட்டுள்ளது.  மேலும், தமிழ், இந்தி, தெலுங்கு, குஜராத்தி, மராத்தி மற்றும் பெங்காலி ஆகிய மொழிகளிலும் ஸ்கைப் இயங்கும் என்று அறிவிக்கப்பட்டுள்ளது. இதன்மூலம் ஸ்கைப் லைட் செயலியின் செட்டிங்ஸ் உள்ளிட்டவைகளை ஆங்கிலம் தெரிந்திருந்தால்தான் கையாள முடியும் என்ற நிலை மாறி, பிராந்திய மொழிகளிலேயே அந்த செயலியைக் கையாள முடியும். இந்த செயலியை கூகுள் ப்ளேஸ்டோரில் இலவசமாக பதிவிறக்கம் செய்துகொள்ளலாம்.

பயம் வேண்டாம்

நம்முடைய மார்பின் ஒரு பக்கம் மட்டும் வலியை உணர்ந்தால் இது இருதய சம்பந்தமான நோய் என்று பயப்படவேண்டாம்.  அதற்கு எலும்பு முறிவு, குருத்தெலும்பு அழற்சி, வைரஸ் தொற்றுகள், மார்பு தசைகளுக்கு கொடுக்கப்படும் கஷ்டம், அதிகப்படியான அமில சுரப்பு போன்றவை காரணங்களாக இருக்கலாம்.

அறிகுறிகள்

ஒருவருக்கு அஜீரண கோளாறுகள் ஏற்படுவதற்கு மோசமான உணவுப் பழக்கங்கள், உடல் பருமன், அசிடிட்டி, வயிற்று அல்சர், மலச்சிக்கல், குறிப்பிட்ட மருந்துகள் போன்றவை காரணங்களாக அமைகின்றன. இவை தீவிரமாக இருந்தால், அடிவயிற்றில் வலி, வயிற்று உப்புசம், வாய்வுத் தொல்லை, ஏப்பம், குமட்டல், வாந்தி போன்ற அறிகுறிகள் தென்படும்.

வினோத மக்கள்

இந்தோனேசியாவில் இருக்கும் ஒரு சிறிய தீவு பகுதி சுலவேசி தீவு. இங்கு வாழும் டோராஜன் மக்கள் தங்கள் வீட்டில், குடும்பத்தில் யார் இறந்தாலும், அதை மரணமாக கருதுவது இல்லை. ஒருவருக்கு மரணமே இல்லை என நம்பும் இவர்கள் இறந்தவர்களை தங்களுடனேயே வைத்துக் கொள்கின்றனர்.