வர்த்தக நகரான நியூயார்க்கில் நிலநடுக்கம்

நியூயார்க்,ஆக.25 - இந்தியாவில் வர்த்தக நகரான மும்பை போன்று அமெரிக்காவின் வர்த்தக நகரமான நியூயார்க்கில் நிலநடுக்கம் ஏற்பட்டது. இதன் அளவு ரிக்டரில் 5.8ஆக பதிவாகி இருந்தது. இதனால் நியூயார்க் நகரில் சேதம் ஏதும் ஏற்படவில்லை என்பது குறிப்பிடத்தக்கது. துறைமுக நகரான நியூயார்க் நகரில் கடந்த செவ்வாய் அன்று இந்த நிலநடுக்கம் ஏற்பட்டது. இதனையொட்டி அடுக்கமாடி கட்டிடங்களில் வசிக்கும் ஆயிரக்கணக்கானோர் கீழே கொண்டுவரப்பட்டு தங்க வைக்கப்பட்டனர் என்று நியூயார்க் நகர மேயர் மைக்கேல் பூலூம்பர்க் தெரிவித்துள்ளார். நிலநடுக்கத்தில் எந்தவித சேதமும் இல்லை என்றும் இதற்காக கடவுளுக்கு நன்றியை தெரிவித்துக்கொள்கிறேன் என்றும் மைக்கேல் தெரிவித்தார். அனைத்து சேவைகளும் மாமூல் நிலைமைக்கு திரும்பியுள்ளன. பாதாள ரயில் போக்குவரத்து உள்பட அனைத்துவிதமான போக்குவரத்துகளும் வழக்கமாக நடைபெற்று வருகின்றன. இந்த பூமி அதிர்ச்சியானது வர்ஜினீயாவில் மையம் கொண்டியிருந்தது.