தூத்துக்குடி : தூத்துக்குடி அருகே தீவு பகுதிகளில் கடல்படை, வனத்துறை மற்றும் கடலோர பாதுகாப்பு குழுமத்தை சேர்ந்த அதிகாரிகள் சோதனை நடத்தி வருகின்றனர்.

தூத்துக்குடி மன்னார் வளைகுடா கடல் பகுதியில் உள்ள தீவுப் பகுதிகளில் சட்டவிரோத கடத்தல் மற்றும் அந்நிய நபர்களின் ஊடுருவல் உள்ளதா என்பது குறித்து கடலோர பாதுகாப்பு படை கடலோர பாதுகாப்பு குழும போலீசார் வனத்துறை அதிகாரிகள் ஆகியோர் கூட்டாக படகு மூலம் சென்று தீவிர சோதனை நடத்தினர்.

தூத்துக்குடி மன்னார் வளைகுடா கடல் பகுதி பல்வேறு தீவுகள் அமைந்த பாதுகாக்கப்பட்ட பகுதியாகும். வெளி நபர்கள் உள்ளே நுழைய தடை செய்யப்பட்ட பகுதியாகும். இந்நிலையில் சில அந்நிய நபர்கள் தீவு பகுதிகளில் சட்ட விரோதமாக உள்ளே நுழைந்து இலங்கைக்கு பல்வேறு பொருட்களை கடத்தி செல்வதாக கடலோர பாதுகாப்பு குழும போலீசாருக்கு தகவல் கிடைத்தது

இதைத் தொடர்ந்து மன்னார் வளைகுடா பகுதியில் அமைந்துள்ள வான் தீவு, காரைசல்லி தீவு, காசுவாரி தீவு உள்ளிட்ட தீவுப் பகுதிகளில் சட்டவிரோத கடத்தல் சம்பவங்கள் நடைபெறுகிறதா? அந்நிய நபர்களின் ஊடுருவல் உள்ளதா? என்பதை கண்காணிக்கும் வகையிலும் இந்திய கடலோர காவல் படை மற்றும் கடலோர பாதுகாப்பு குழும போலீசார் மற்றும் வனத்துறை அதிகாரிகள் இணைந்த குழுவினர் கடலோர பாதுகாப்பு குழும படகு மற்றும் வனத்துறை படகில் சென்று தீவிர சோதனையில் ஈடுபட்டு வருகின்றனர்,

இதில், கடலோர பாதுகாப்பு குழும துணை கண்காணிப்பாளர் பிரதாபன் தலைமையில் வேம்பார் கடல் காவல் நிலையம் ஆய்வாளர் சைரஸ், உதவி ஆய்வாளர்கள் முத்துமாரி தேவேந்திரர், தாமரைச்செல்வி, தூத்துக்குடி கடலோர காவல்படை அதிகாரிகள் மிசாகா, பிரமோத் அப்புக்குட்டன், வனத்துறை அதிகாரிகள் ஜினோபிளசில், ரேஞ்சர் (இன்ஸ்பெக்டர்) மதன்குமார், மற்றும் 25க்கும் மேற்பட்ட காவல்துறையினர் சோதனையில்  ஈடுபட்டு வருகின்றனர்.