மெல்போர்னில் சபாநாயகர் அப்பாவுக்கு உற்சாக வரவேற்பு

மெல்போர்ன், மெல்போர்ன் நகரில் வசிக்கும் தமிழர்களின் சார்பில் பேரவைத் தலைவர் அப்பாவுக்கு வரவேற்பு நிகழ்ச்சி அளிக்கப்பட்டது. 

இது குறித்து வெளியிடப்பட்டுள்ள அறிக்கையில், 

ஆஸ்திரேலியா, சிட்னி நகரில் நடைபெற்ற 67-வது காமன்வெல்த் பாராளுமன்ற மாநாட்டில் தமிழக சட்டமன்றப் பேரவைத் தலைவர் அப்பாவு கலந்துகொண்டு உரையாற்றினார். பின்பு, அங்கிருந்து புறப்பட்டு மெல்போர்ன் நகரைச் சென்றடைந்தார். நேற்று மெல்போர்ன் நகரில் வசிக்கும் தமிழர்கள் சார்பில்   நடைபெற்ற வரவேற்பு நிகழ்ச்சியில் சபாநாயகர் அப்பாவு கலந்து கொண்டு உரையாற்றியதாவது, 

 இந்த அப்பாவு 15 ஆண்டு காலம் ஆசிரியராக பணியாற்றியவன். ஒரு பள்ளியில் ஆசிரியராக பணியாற்றியதை தற்போது நான் நினைத்துப் பார்க்கின்றேன். எவ்வாறு இந்த நிகழ்ச்சியை ஒருங்கிணைத்து, நடத்தி கொண்டிருக்கிறீர்கள் என்பதை வியப்பாக பார்க்கின்றேன்.   எவ்வளவு கடினமாக உழைத்து, இங்குள்ள குழந்தைகளுக்கு தமிழைக் கற்றுக்கொடுத்து, நல்ல ஒழுக்கத்தையும் கற்றுக்கொடுத்துக் கொண்டிருக்கின்ற அருமையான நிகழ்ச்சிகளை தயார் செய்துகொண்டு வந்திருக்கின்ற ஆசிரியப் பெருமக்களுக்கு நன்றியைத் தெரிவித்துக்கொள்கிறேன்.

இந்தப் பள்ளிக்கு தமிழக அரசு சார்பாக என்ன உதவி தேவை என்பதை என்னுடைய கவனத்திற்கு கொண்டுவந்தால், அதை நான் முதல்வரின்  கவனத்திற்கு எடுத்துச்சென்று, இப்பள்ளி இன்னும் மேம்பாடு அடைவற்கும். அனைவரும் தமிழ் கற்க வேண்டுமென்பதற்காகவும் வேண்டிய உதவிகளை நிச்சயமாகச் செய்வேன். இவ்வாறு அவர் பேசினார்.