2025-ம் ஆண்டுக்கான டி.என்.பி.எஸ்.சி. தேர்வு அட்டவணை வெளியீடு

சென்னை, 2025-க்கான வருடாந்திர தேர்வு அட்டவணையை டி.என்.பி.எஸ்.சி. நேற்று வெளியிட்டுள்ளது. அதன் அதிகாரபூர்வ இணையதளத்தில் (www.tnpsc.gov.in) விவரம் இடம்பெற்றுள்ளது. 

ஓராண்டில் எந்தெந்த பதவிகளுக்கு எப்போது தேர்வு நடத்தப்படும் என்பது உள்ளிட்ட விவரங்கள் அடங்கிய வருடாந்திர தேர்வு அட்டவணையை டி.என்.பி.எஸ்.சி. ஆண்டுதோறும் வெளியிட்டு வருகிறது.

அந்த வகையில், அடுத்த ஆண்டுக்கான வருடாந்திர தேர்வு அட்டவணையை டி.என்.பி.எஸ்.சி. இணையதளத்தில் (www.tnpsc.gov.in) நேற்று வெளியிடப்பட்டுள்ளது. இதில் குருப்-1 தேர்வு, குருப்-4, தேர்வு ஒருங்கிணைந்த குருப்-2 மற்றும் 2-ஏ தேர்வு, ஒருங்கிணைந்த தொழில்நுட்பப் பணிகளுக்கான தேர்வு உள்பட மொத்தம் 7 தேர்வுகள் இடம்பெற்றுள்ளன. 

ஒவ்வொரு தேர்வுக்கான அறிவிப்பு எப்போது வெளியிடப்படும், எப்போது தேர்வு நடத்தப்படும் என்ற விவரங்களை தேர்வர்களே அறிந்து கொள்ளலாம். காலியிடங்களின் விவரம் தேர்வுக்கான அறிவிப்பின்போது தெரிவிக்கப்படும் என அதில் அறிவிக்கப்பட்டுள்ளது.

அதன்படி, குரூப் 1 தேர்வுக்கான அறிவிப்பு அடுத்தாண்டு ஏப்ரல் 1-ம் தேதி வெளியிடப்பட்டு, ஜூன் 15-ம் தேதி தேர்வு நடத்தப்படும் என அறிவிக்கப்பட்டுள்ளது. குரூப் 4 தேர்வுக்கான அறிவிப்பு ஏப்ரல் 25-ம் தேதி வெளியிடப்பட்டு,  ஜூலை 13-ம் தேதி நடத்தப்படும் என்றும் தெரிவிக்கப்பட்டுள்ளது.

இன்டர்வ்யூ தேர்வுக்கான அறிவிப்பு மே 07-ம் தேதி வெளியிடப்பட்டு ஜூலை 21-ம் தேதி தேர்வு  நடத்தப்படும் என்றும்,  இன்டர்வ்யூ அல்லாத தேர்வுக்கான அறிவிப்பு மே21-ம் தேதி வெளியிடப்பட்டு  ஆகஸ்ட் 4-ம் தேதி தேர்வு நடைபெறும் என்றும் அறிவிக்கப்பட்டுள்ளது.  

டிப்ளமோ /ஐ.டி.ஐ படித்தவர்களுக்கான தேர்வுக்கான அறிவிப்பு ஜூன் 13-ம் தேதி வெளியிடப்பட்டு ஆகஸ்ட் 27-ம் தேதி தேர்வு நடத்தப்படும் என்றும்,   குரூப் 2 மற்றும் 2ஏ  தேர்வுகளுக்கான அறிவிப்பு ஜுலை 15-ம் தேதி வெளியிடப்பட்டு செப்டம்பர் 28-ம் தேதி தேர்வு நடத்தப்படும் என்று அறிவிக்கப்பட்டுள்ளது. 

குரூப் 5ஏ தொகுதி தேர்வுக்கான அறிவிப்பு  அக்டோபர் 07-ம் தேதி வெளியிடப்பட்டு   டிசம்பர்  21-ம் தேதி தேர்வு நடத்தப்படும் என்றும்,  தேர்வு குறித்த மேலும் விபரங்களுக்கு www.tnpsc.gov.in என்ற அதிகாரப்பூர்வ இணையதள பக்கத்தில் தெரிந்து கொள்ளலாம் என்றும் அறிவிக்கப்பட்டுள்ளது.